მსახიობ ანდრო ჭიჭინაძესთან, რომელიც პროევროპული აქციების დროს დააკავეს, ევროპის საბჭოს საპარლამენტო ასამბლეის დელეგაცია აპირებს შესვლას. ამის შესახებ ინფორმაციას დაკავებულის ადვოკატი, თორნიკე მიგინეიშვილი ავრცელებს.

გავრცელებული ინფორმაციით, PACE-ს დელეგაციის წევრები, ანდრო ჭიჭინაძესთან ერთად, ასევე პარლამენტთან მიმდინარე საპროტესტო აქციების დროს დაკავებულ ზვიად ცეცხლაძესაც მოინახულებენ.

"რამდენიმე წუთში გლდანის პენიტენციურ დაწესებულებაში მოვინახულებ ანდრო ჭიჭინაძეს. დღეს განსხვავებული შეხვედრა იქნება.

ანდროსთან ციხეში საგამონაკლისო წესით ჩემთან ერთად ევროსაბჭოს საპარლამენტო ასამბლეის მაღალი თანამდებობის პირები შევლენ.

ეს არის კიდევ ერთი უპრეცედენტო მაგალითი ევროპელი მეგობრების მხარდაჭერისა და სინდისის პატიმრების მიმართ სოლიდარობის გამოხატვის!", — წერს მიგინეიშვილი სოციალურ ქსელში.

ამასთან, PACE-ს დელეგაცია მანამდე "კოალიცია ცვლილებისთვის", "ერთიანი ნაციონალური მოძრაობისა" და "ძლიერი საქართველოს" წევრებს შეხვდა. შემდეგ კი გიორგი გახარიას, მისივე სახლში.