დღეს, 16 იანვარს, ევროპის საბჭოს საპარლამენტო ასამბლეის დელეგაციას 3 ოპოზიციური გაერთიანების: კოალიცია ცვლილებისთვის, ერთიანობა-ნაციონალური მოძრაობისა და ძლიერი საქართველოს ლიდერები შეხვდნენ.

მოგვიანებით, შეხვედრასთან დაკავშირებით ოპოზიციონერმა პოლიტიკოსებმა კომენტარი გააკეთეს.

კოალიცია ცვლილებებისთვის ერთ-ერთი ლიდერის, ზურაბ ჯაფარიძეს თქმით, შეხვედრისას ისაუბრეს არჩევნების შემდგომ განვითარებულ მოვლენებზე, მათ შორის, იმაზეც, თუ რა ზომებს მიმართავს "ქართული ოცნება" მშვიდობიანი დემონსტრანტების წინააღმდეგ.

"საუბარი იყო იმაზე, არჩევნების შემდეგ მოვლენები როგორ განვითარდა. მათ შორის, დეფაქტო ხელისუფლება მშვიდობიანი დემონსტრანტების წინააღმდეგ რა ზომებს მიმართავს. ასევე, ვილაპარაკეთ წამების ფაქტებზე. იმაზეც ვისაუბრეთ, თუ რამდენად უმოქმედოა პოლიცია - კადრები არსებობს, სადაც ჩანს, რომ დაორგანიზებული ტიტუშკები ადამიანს ფიზიკურად უსწორდებიან, პოლიცია კი სრულიად უმოქმედოა. გარდა ამისა, საუბარი შეეხო იმასაც, რომ მთელი ამ პერიოდის განმავლობაში, მოვლენები როგორც განვითარდა, არცერთი არც პოლიციელი და არც ტიტუშკა დასჯილი არაა [...]

მოვახსენეთ, რომ პროტესტი იქამდე გაგრძელდება, სანამ ის ხალხი, რომელიც ყოველდღე ქუჩაში გამოდის, არ გაიმარჯვებს. ავუხსენით, რომ გამოსავალი მხოლოდ 2 პუნქტია: პოლიტპატიმრების გათავისუფლება და ახალი წესებითა და ახალი ადმინისტრაციით ხელახალი არჩევნების ჩატარება", — განაცხადა ჯაფარიძემ.

შეხვედრის შემდეგ, კომენტარი გააკეთა ერთიანობა-ნაციონალური მოძრაობის ლიდერმა, თინა ბოკუჩავამ.

აღნიშნული შეხვედრის შესახებ კომენტარი გააკეთა ერთიანობა-ნაციონალური მოძრაობის ლიდერმა, თინა ბოკუჩავამაც. მისი თქმით, დელეგაზია საქართველოში იმ მიზნით ჩამოვიდა, რომ "რეპრესიებისა და ადამიანის უფლებების დარღვევის მტკიცებულებები შეაგროვოს".

"ევროსაბჭოს თანამომხსენებლებმა ჯერ კიდევ საქართველოში ჩამოსვლამდე თქვეს, რომ მათი ვიზიტი დეფაქტო ხელისუფლების ლეგიტიმაციას არ ემსახურება [...] პირიქით, დელეგაცია აქ იმისთვისაა, რომ იმ რეპრესიებისა და ადამიანის უფლებების დარღვევის მტკიცებულებები შეაგროვოს, რასაც ივანიშვილის რუსული რეჟიმის მხრიდან ყოველდღე ვხედავთ", — ამბობს ბოკუჩავა.

შეხვედრის დეტალებზე ისაუბრა კოალიცია ძლიერი საქართველოს ერთ-ერთმა ლიდერმა, სალომე სამადაშვილმაც.

"იმაზე გვქონდა საუბარი, ჩვენი აზრით, მნიშვნელოვანი რატომაა, რომ ახალი არჩევნები სწრაფად დაინიშნოს და როგორი ხედვაა ამ არჩევნებთან დაკავშირებით [...] მათ ყოვლისმომცველი ინფორმაცია აქვთ [...] დარწმუნებული ვარ, მათ ანგარიშში ის რეალობა აისახება, რაც დღეს ქვეყანაში შექმნილია", — განაცხადა სამადაშვილმა.