15 იანვარს, შეერთებული შტატების დემოკრატი პრეზიდენტი, ჯო ბაიდენი, უფლებამოსილების ამოწურვამდე რამდენიმე დღით ადრე, თეთრი სახლის ოვალური კაბინეტიდან, ამერიკელებს მიმართა და გამოემშვიდობა.

ბაიდენმა ვიდეომიმართვაში ისაუბრა თავისი ადმინისტრაციის მრავალ, მათ შორის ეკონომიკურ მიღწევებზე, რაზეც აშშ-ის ჯერ კიდევ მოქმედი პრეზიდენტი ამბობს, რომ ამერიკელები დროთა განმავლობაში უფრო იგრძნობენ. ამასთან, მან აშშ-ის მოქალაქეები გააფრთხილა ოლიგარქიის მზარდ საშიშროებაზე.

როგორც ბაიდენი ამბობს, ამერიკაში ყალიბდება ოლიგარქია და ემუქრება დემოკრატიას, ძირითად უფლებებს და თავისუფლებას, და სხვების მიერ წარმატების პატიოსნად მიღწევის შანსებს. იგი აღნიშნავს, რომ მასში განსაკუთრებით შეშფოთებას იწვევს მცირერიცხოვანი უმდიდრესი ადამიანების ხელში ძალაუფლების სახიფათო კონცენტრაცია.

ცნობისთვის, აშშ-ის არჩეული პრეზიდენტი, რესპუბლიკელი დონალდ ტრამპი Tesla-ს და SpaceX-ის მფლობელის, მილიარდერი ილონ მასკის გარემოცვაშია და აპირებს, რომ მას ახალი, ე.წ. მთავრობის ეფექტიანობის დეპარტამენტის მართვა დაავალოს.

ტრამპი პრეზიდენტის უფლებამოსილების შესრულებას 2025 წლის 20 იანვრიდან შეუდგება.