უკვე 47-ე დღეა [30 ნოემბრიდან] საზოგადოებრივი მაუწყებლიდან პროტესტი გრძელდება. აქციის მონაწილეები პირველი არხის დღის ეთერი გახსნას და დირექტორის თინათინ ბერძენიშვილისა და არხის სამეურვეო საბჭოს თავმჯდომარის, ვასილ მაღლაფერიძის გადადგომას მოითხოვენ.

"ჩვენი პროტესტი გრძელდება. ჩვენ 3 იანვრიდან განვაახლეთ საზოგადოებრივი მაუწყებლის წინ პროტესტი და ამის შემდეგ მაუწყებლის სტრატეგია შეიცვალა და არის სრული იგნორირება, არ პასუხობენ ჩვენს სატელეფონო ზარებს, შეტყობინებებს, ვითხოვთ შეხვედრას და არანაირ კავშირზე არ გამოდიან, ფაქტობრივად გაქრნენ და აღარ არსებობენ. [...] ახლა, 13 იანვრიდან აღადგინეს ეთერი და კვირაში სამჯერ აპირებენ ღამის ეთერში მაუწყებლობას და არა სახალხო წარმომადგენლობით არამედ, მათი შერჩეული სტუმრებით ... ამას ჩვენი პროტესტი კიდევ უფრო მეტი სიმტკიცით შეხვდება" — ამბობს აქციის მონაწილე, განათლების ექსპერტი გიორგი ჭანტურია

ცნობისთვის, 23 დეკემბერს, საზოგადოებრივი მაუწყებლის თანამშრომლების ნაწილმა (79 თანამშრომელი) ტელევიზიის შენობასთან ბრიფინგზე, განცხადება წაიკითხეს და არხის მენეჯმენტს მოუწოდეს, "ამ კრიტიკულ დროს უპასუხოს საზოგადოების მოთხოვნას და გახსნას დღის სატელევიზიო ეთერი".

მათი თქმით, არაერთი საჯარო მიმართვის თუ ოფიციალური წერილის მიუხედავად, საზოგადოებრივი მაუწყებელი ტექნიკური მიზეზით ეთერს არ ხსნის, თუმცა ისინი ამბობენ, რომ ნების შემთხვევაში, ამის უზრუნველყოფა შესაძლებელია.

"ვითხოვთ საქართველოს პირველი არხისგან, რომ გახსნას დღის ეთერი. ჩვენ მივმართეთ ასევე წერილობით და მიუხედავად იმისა, რომ ბევრი რამ ვცადეთ, მენეჯმენტი დღემდე გვეუბნება ამაზე უარს. მნიშვნელოვანია ითქვას, რომ მთავარი მიზეზი, რის გამოც საზოგადოებრივი მაუწყებლის მენეჯმენტი უარს ამბობს ამ ეთერის გახსნაზე, არის ტექნიკური. მაგრამ ჩვენ ვიცით და გვჯერა, რომ მონდომების შემთხვევაში, ნების შემთხვევაში ტექნიკურად დღის რამდენიმესაათიანი ეთერის უზრუნველყოფა ამ არხზე შესაძლებელია”, – თქვა საზოგადოებრივი მაუწყებლის თანამშრომელმა, თამარ მშვენიერაძემ.

საზმაუსთან პროტესტი ამ წუთებშიც გრძელდება. აქციის მონაწილეები დღის ეთერის გახსნას და თინათინ ბერძენიშვილისა და ვასილ მაღლაფერიძის განცხადებას ითხოვენ.

ასევე იხილეთ: