საპარლამენტო უმრავლესობის წევრმა, ვარლამ ლიპარტელიანმა "იმედთან", ბათუმში, სასტუმრო შერატონში, დიტო სამხარაძესა და გიორგი გახარიას შორის მომხდარ დაპირისპირებაზე ისაუბრა.

"თუ თავს დაგვესხმებოდა და ჭიქიან ხელს ჩაგვარტყამდა, ბუნებრივია, საკადრის პასუხს გავცემდი მეც, ისევე როგორც დიტომ გასცა საკადრისი პასუხი, თუმცა სამწუხაროდ იქ არ ვიყავი, როცა ეს ამბავი მოხდა. ამ დროს მე თბილისში ვიმყოფებოდი", — აღნიშნა ლიპარტელიანმა.

ლიპარტელიანი გავრცელებულ ინფორმაციას იმის შესახებ თითქოს ოპოზიციის ერთ-ერთ ლიდერ გიორგი გახარიასა და ქართული ოცნების დეპუტატ დიმიტრი სამხარაძეს შორის ფიზიკური დაპირისპირებისას ისიც ადგილზე იმყოფებოდა, სპეკულაციას უწოდებს.

"რატომ გაჩნდა ჩემი სახელი, წარმოდგენა არ მაქვს. ეგრე იმასაც ამბობდნენ, იმედი იტყუება, გახარიას არ დაუწყია ფიზიკური ძალადობა, თავს დაესხნენო. ფაქტია, ბათუმში ბოლოს ჩვენი ნაკრების თამაში რომ იყო, მაშინ ვიყავი, იმის მერე არ ვყოფილვარ", — აცხადებს ლიპარტელიანი.

ცნობისთვის, გუშინ 14 იანვარს, "გახარია — საქართველოსთვის" ლიდერს, გიორგი გახარიას ბათუმში, სასტუმრო შერატონში, "ქართული ოცნების" წევრები თავს დაესხნენ.

გახარია მალევე კლინიკაში გადაიყვანეს, თუმცა მოგვიანებით მან საავადმყოფო დატოვა. ექიმის თქმით, ოპოზიციონერ პოლიტიკოს ტვინის შერყევა და ცხვირის ძვლის მოტეხილობა აქვს.

როგორც მედიაში ვრცელდება ინფორმაცია, ერთ-ერთი პირი, რომელიც გახარიასთან დაპირისპირებაში მონაწილეობდა, ქართული ოცნების დეპუტატი, დიმიტრი სამხარაძეა.

ამასთან, იმავე სასტუმროში თავს დაესხნენ არასამთავრობო სექტორის წარმომადგენელ ზვიად ქორიძესაც. ქორიძის ინფორმაციითაც, მას "ქართული ოცნების" წარმომადგენელი დიმიტრი სამხარაძე და მისი თანმხლები პირები დაუპირისპირდა.