თბილისში, მთაწმინდაზე ხანძარი ლოკალიზებულია. ინფორმაციას შინაგან საქმეთა სამინისტროს პრესსამსახური ავრცელებს.

ხანძრის შესახებ ინფორმაცია 112-ში დაახლოებით ორი საათის წინ შევიდა. როგორც On.ge-ს საგანგებო სიტუაციების მართვის სამსახურში განუცხადეს, ცეცხლი ბალახს, ბუჩქებსა და ხეებს უკიდია.

უწყების ცნობით, ადგილზე მობილიზებულია ათეულობით სამაშველო ტექნიკა, მეხანძრეები ორი მხრიდან ცდილობენ ცეცხლის ჩაქრობას. ხანძრის ადგილზე ელოდებიან სამაშველო ვერტმფრენსაც.

ხანძარი მთაწმინდის ფერდობზე 8 აგვისტოსაც იყო. საგანგებო სიტუაციების სამსახურის ინფორმაციით, დღევანდელი ხანძარი იმ დროინდელი ხანძრის ლოკაციის მარჯვენა მხარეს გაჩნდა.