აშშ-ში ბოლო 12 წლის განმავლობაში ყველაზე ძლიერი ქარიშხალი ჰარვი ტეხასისა და ლუიზიანას შტატების მოსახლეობას დღითიდღე ახალ საფრთხეებს უქმნის.

ჰიუსტონიდან 40 კილომეტრში მდებარე ერთ-ერთი ქიმიური ქარხნის მმართველმა კომპანიამ ოთხშაბათს განაცხადა, რომ ძლიერი წყალდიდობის გამო საწარმოს ელექტროენერგიის მიწოდება შეუწყდა, მწყობრიდან გამოვიდა გენერატორი, რის გამოც გაითიშა ქარხნის გაგრილების სისტემა. აღნიშნულ ქარხანაში ინახება ქიმიური ნივთიერებები, რომელსაც მუდმივი გაგრილება სჭირდება, წინაღმდეგ შემთხვევაში, მოსალოდნელია აფეთქება.

როგორც ქარხნის მმართველი კომპანია ამბობს, დიდი ალბათობით, აფეთქება გარდაუვალია და ეს მხოლოდ დროის საკითხია. კომპანიას კატასტროფის თავიდან აცილების საშუალება არ აქვს, რადგან ის ქარხანა ორ მეტრამდე წყალმა დატბორა.

მხოლოდ ჰიუსტონში, რომელიც საფრთხის შემცველი ქიმიური ქარხნიდან 40 კილომეტრში მდებარეობს, 2,3 მილიონზე მეტი ადამიანი ცხოვრობს.

ქარიშხალი ჰარვი ტეხასის შტატს გასულ კვირას დაატყდა თავს. მსგავსი სიძლიერის ქარიშხალი აღნიშნულ შტატში ბოლო 50 წლის განმავლობაში არ ყოფილა, თუმცა ამაზე ძლიერი ქარიშხალი იყო კატრინა, რომელმაც 12 წლის წინ გადაუარა ნიუ ორლეანსა და აშშ-ს სამხრეთ-აღმოსავლეთის სხვა სანაპირო რეგიონებს.

ქარიშხალ ჰარვის თან მოჰყვა ძლიერი ტროპიკული წვიმები, რის გამოც ათეულობით დასახლება დაიტბორა. Fox News-ის ინფორმაციით, 32 ათასი ადამიანი ამ დრომდე საგანგებოდ მოწყობილ თავშესაფრებში რჩება, დაღუპულია რამდენიმე ათეული ადამიანი, მაშველებმა სიკვდილს გადაარჩინეს ასეულობით მოქალაქე.

როგორც ტეხასის გუბერნატორი გრეგ ებოტი ამბობს, შტატს, ქარიშხლის შედეგების აღმოსაფხვრელად, ფედერალური ბიუჯეტიდან $125 მილიარდი დასჭირდება.