ამერიკის კინოაკადემიის დაჯილდოვების 90-ე ცერემონიალზე, უცხოენოვანი ფილმის კატეგორიაში წარსადგენად საქართველოდან ანა ურუშაძის ფილმი, საშიში დედა, გაიგზავნება. ამის შესახებ ინფორმაცია რამდენიმე წუთის წინ გახდა ცნობილი.

საშიში დედა, რომელშიც მთავარ როლს ნატა მურვანიძე ასრულებს, აკრძალვებსა და სტერეოტიპებზე, მორალურ ნორმებსა და სოციალურ პასუხისმგებლობაზე მოგვითხრობს.

ფილმი 50 წლის ქალის - მანანას ცხოვრებას ასახავს. დედა და დიასახლისი დილემის წინაშე დგას, მას უწევს არჩევანი გააკეთოს ოჯახურ ცხოვრებასა და დიდი ხნის ვნებიან გატაცებას შორის. მანანა ცხოვრების აზრს წერაში პოულობს.

ამერიკის კინოაკადემიამ, ტრადიციულად, თხოვნით მიმართა ეროვნულ კინოცენტრს, შეერჩია 2017 წლის კანდიდატი ფილმი საქართველოდან ოსკარის ნომინაციისთვის - საუკეთესო უცხოენოვანი ფილმი.

2 აგვისტოს ეროვნულმა კინოცენტრმა განაცხადების მიღება დაიწყო, რომელიც 11 აგვისტოს დასრულდა. კონკურსის ფარგლებში სულ შევიდა ოთხი განაცხადი, შესაბამისად, ოსკარზე საქართველოს კანდიდატი ფილმის სტატუსის მოსაპოვებლად წელს ოთხი ქართული ფილმი იბრძოდა: ჩემი ბედნიერი ოჯახი (რეჟისორები: ნანა ექვთიმიშვილი და სიმონ გროსი), მძევლები (რეჟისორი: რეზო გიგინეიშვილი), ლუკა (რეჟისორი: გიორგი ბარაბაძე) და საშიში დედა (რეჟისორი: ანა ურუშაძე).

იქნება თუ არა საშიში დედა წარდგენილი საუკეთესო უცხოენოვანი ფილმის კატეგორიაში ამას 2018 წლის 23 იანვარს, ნომინანტთა საბოლოო სიის გამოცხადების დროს გავიგებთ, რაც შეეხება დაჯილდოებას ის მომდევნო წლის 4 მარტს ლოს-ანჯელესში, დოლბის თეატრში ჩატარდება.