ქალაქის მერის, კახა კალაძის მიერ თბილისის საკრებულოში ბიუჯეტის დასამტკიცებლად წარდგენას ოპოზიციური პარტიების წარმომადგენლები არ ესწრებიან.

სხდომაზე კახა კალაძე დედაქალაქის მერიის წლიურ ანგარიშს წარადგენს და დასამტკიცებლად განიხილება 2025 წლის ბიუჯეტი.

კოალიცია ცვლილებისთვის წევრები აცხადებენ, რომ კალაძესთან "ყალბ დისკუსიაში შესვლა იქნება ყოველდღიურად ბრძოლაში მყოფი, გულანთებული, პატრიოტი თბილისელების ღალატი".

"ჩვენ, კოალიცია ცვლილებისთვის წევრები აღნიშნულ სხდომას არ დავესწრებით. დარბაზში ისხდებიან მხოლოდ კალაძე და მისი ხელქვეითები.

კორუფციით სახელგანთქმულ თბილისის მერ კახა კალაძესთან ერთად, რომელიც ამავდროულად არის ქართული ოცნების გენერალური მდივანი, შესაბამისად — არალეგიტიმური ხელისუფლების, ერთ-ერთი მთავარი სპიკერი და ანტიკონსტიტუციური, ანტისახელმწიფოებრივი, ანტიდემოკრატიული, ძალადობრივი ქმედებებისა და რეჟიმის გამმართლებელი დაუშვებლად მიგვაჩნია მასთან ერთად საკითხების განხილვაში მონაწილეობა", — აღნიშნულია განცხადებაში, რომელსაც ხელს აწერენ: ცოტნე კობერიძე, ნინო კვიტაიშვილი, ანა გოგოლაძე, გიორგი ონიანი, თორნიკე ბიკაშვილი, მამუკა გუგეშაშვილი.

ფრაქციის თბილისი საქართველოსთვის თავმჯდომარემ, თამარ ხვედელიანმა საკრებულოში გამართულ ბრიფინგზე თქვა, რომ დღევანდელ სხდომას კორუმპირებულ, მოღალატე და მოძალადე ოცნების უმრავლესობასთან ერთად არ დაესწრებიან.

"არ დავესწრებით დღევანდელ სხდომას კორუმპირებულ, მოღალატე და მოძალადე „ოცნების“ უმრავლესობასთან ერთად. ჩვენ პროტესტის ნიშნად ვტოვებთ სხდომას და დღეს, 19:00 საათზე ყველას გელოდებით დედაქალაქის მთავარ გამზირზე.

ერთად მოვითხოვოთ ახალი არჩევნები და ივანიშვილის მიერ მძევლად აყვანილი, უკანონოდ დაპატიმრებული ჩვენი მოქალაქეების გათავისუფლება!

ამ ბრძოლას ჩვენ ერთად აუცილებლად მოვიგებთ — ერთად დავაბრუნებთ საქართველოს ნორმალური, ევროპული, დემოკრატიული განვითარების გზაზე!", — განაცხადა თამარ ხვედელიანმა.

ერთიანობა-ნაციონალური მოძრაობის წარმომადგენლის, ირაკლი ნადირაძის განცხადებით, წარმოუდგენლად მიაჩნიათ „დემოკრატიობანა“ ითამაშონ კალაძესთან ერთად ისე, თითქოს ქვეყანაში არაფერი არ ხდება. ნადირაძის განცხადებით, პროტესტს ქუჩაში გააგრძელებენ.

"სანქცირებული კახი კალაძე არის ქართული ოცნების გენერალური მდივანი, რომელმაც ქვეყანას დააკარგვინა ევროპული პერსპექტივა და წაიყვანა რუსეთისკენ. ეს ადამიანი ასევე არის ზონდერ ჯგუფების ერთ-ერთი მთავარი დამფინანსებელი და მფარველი, რომლებიც ყოველდღიურად სცემენ, იტაცებენ, შეურაცხყოფას აყენებენ მშვიდობიან მომიტინგეებს, ამიტომ მიუხედავად იმისა, რომ ქალაქში არის მილიონი პრობლემა, საცობით, პარკირებით, საზოგადოებრივი ტრანსპორტით დაწყებული პრობლემა, წარმოუდგენელია, რომ ამ უნიღბო რუსეთუმესთან ერთად დავსხდეთ საკრებულოში, ვითომ ქვეყანაში არაფერი არ ხდება და დემოკრატიობანა ვითამაშოთ, ამიტომ თუ გვინდა პოლიტიკა დაბრუნდეს საკრებულოში, პარლამენტში და ქვეყანაში, გამოსავალი არის პოლიტიკური პატიმრების გათავისუფლება და ახალი არჩევნების დანიშვნა ივანიშვილის და მისი რუსული რეჟიმის გარეშე", – განაცხადა ირაკლი ნადირაძემ.