დემირელის კერძო კოლეჯის დირექტორი, ნინო კავთიაშვილი ავტორიზაციის საბჭოს მიერ აღმოჩენილი დარღვევების უმეტესობას არ ეთანხმება. როგორც კავთიაშვილი On.ge-სთან ამბობს, ხარვეზები იყო, თუმცა მათი უმრავლესობა გაზვიადებულია, თითიდან გამოწოვილია და რეალობას არ შეესაბამება.

დემირელის სკოლის დირექტორი საბჭოს გადაწყვეტილებას პოლიტიკას ვერ უკავშირებს, თუმცა ამბობს, რომ მთელი წელი სკოლა მძიმე ვითარებაში განაგრძობდა სწავლებას:

"რეალურად მუდმივად ტერორიზმის ჭრილში მოიხსენიებენ ამ სკოლას და წარმომადგენელიც [მუსტაფა ემრე ჩაბუქი] ამ ნიშნით დააკავეს."

ნინო კავთიაშვილი მატერიალურ-ტექნიკურ ბაზასთან და ადამიანურ რესურსთან დაკავშირებით, არც ერთ საკითხს ეთანხმება.

არაქართულენოვანი სწავლება

დემირელის კოლეჯის დირექტორი ამტკიცებს, რომ თურქეთიდან წამოსული მოსწავლეები კანონის სრული დაცვით მიიღეს და ამორიცხეს. მისი თქმით, 109 მოსწავლე მიიღეს აღიარებით. მისივე განმარტებით, აღიარების პროცესი არის დროში გაწელილი და რამდენიმე თვე სჭირდება:

"ჩვენ ამ მოსწავლეებს გაკვეთილზე დასწრების ბრძანებით ვრთავდით სასწავლო პროცესში. უბრალოდ, ისინი არ ფასდებოდნენ ამ პერიოდის განმავლობაში. ინტენსიურად გადიოდნენ ქართულ ენაში სწავლების კურსს, რომ მათ რაღაც ეტაპზე მაინც დაეძლიათ საგნები. 109 მოსწავლიდან, რა თქმა უნდა, ყველა მოსწავლესთან მიმართებაში დაიდო მიღების ოქმები, ინდივიდუალური გეგმის დამტკიცება და ა.შ. თუმცა 109 მოსწავლიდან, თუ სწორად მახსოვს 12 მოსწავლეზე გაიპარა ტექნიკური შეცდომა, მხოლოდ ეს რამდენიმე მოსწავლესთან მიმართებით გამოგვრჩა მხედველობიდან თარიღი. ეს დაიხვიეს ხელზე და დაწერეს, რომ მასიურად ხდებოდა მსგავსი რამ."

რაც შეეხება არაქართულენოვან მასწავლებლებს, კავთიაშვილის თქმით, დემირელის სკოლის თურქი ეროვნების მასწავლებლები თავისუფლად საუბრობენ და ასწავლიან ქართულად:

"უმეტესობა აქ ვინც ასწავლიდა 15 წელი ცხოვრობდა საქართველოში და იცოდა ქართული ენა."

ელექტრონული ბაზები

კავთიაშვილის თქმით, საბჭოს წარმომადგენლებმა უხეშად შეადარეს ელექტრონული ბაზის მონაცემები ჟურნალებში დაფიქსირებულ მონაცემებს. მისი მტკიცებით, წლის დასაწყისში მოსწავლეთა რაოდენობა ჟურნალების მიხედვით, ვერაფრით დაემთხვეოდა სასწავლო წლის დასრულების შემდეგ მოსწავლეთა რაოდენობას ბაზაში:

"როცა სასწავლო წელი დასრულდა, ეს მოსწავლეები 2-3 კვირის შემდეგ, მათი გარკვეული რაოდენობა გადავიდნენ სხვა სკოლებში. შესაბამისად, ყველა მოსწავლის გადასვლის ბრძანება ადგილზეა, რომელიც მათ არ მოუთხოვიათ."

გაზიარებული შენიშვნები

ნინო კავთიაშვილი საბჭოს ეთანხმება, რომ უცხოენოვანი მოსწავლეები, შესაძლოა, სრულყოფილად ვერ სწავლობდნენ საგნებს ქართულ ენაზე:

"თუნცად ერთ წელიწადში უცხოენოვანი მოსწავლე ვერ ისწავლის ქართულს, რომ მან დაძლიოს ქართული საგნები. მაშინ კანონმდებლობაში არის ხარვეზი და მაშინ საერთოდ არ უნდა მქონდეს უფლება მივიღო უცხოენოვანი მოსწავლეები."

დემირელის სახელობის კერძო კოლეჯი ზოგადსაგანმანათლებლო დაწესებულების ავტორიზაციის საბჭოს გადაწყვეტილების გასაჩივრებას არ აპირებს, რადგან დირექტორის თქმით, არ არსებობს პრეცედენტი, რომ ამით სკოლას მოეგოს.

საქართველოში, ფეტულა გიულენის ჩაღლარის საგანმანათლებლო ქსელში შემავალი რვა დაწესებულებიდან ორს ავტორიზაცია უკვე შეუწყდა. დემირელის სკოლა ერთი წლის განმავლობაში ვეღარ გააგრძელებს საგანმანათლებლო საქმიანობას. მანამდე ავტორიზაცია ჩამოერთვა ბათუმში მდებარე შაჰინის სკოლა-ლიცეუმს. მეოთხე თვეა წინასაექსტრადიციო პატიმრობა აქვს მისჯილი თურქეთის მოთხოვნით დაკავებულ მუსტაფა ემრე ჩაბუქს, რომელიც 15 წელია საქართველოში ცხოვრობს და საგანმანათლებლო სისტემაში მოღვაწეობს. ის დემირელის კოლეჯის მენეჯერი იყო.

შაჰინის სკოლის დახურვა მეზობელ ქვეყანაში მიმდინარე პროცესებს დაუკავშირა საქართველოს სახალხო დამცველმა უჩა ნანუაშვილმაც და პროცესის მეტი გამჭვირვალობა მოითხოვა.

2016 წლის მარტში თურქეთში სახელმწიფო გადატრიალების მცდელობის ავტორად თურქეთის ხელისუფლებამ აშშ-ში ემიგრირებული სასულიერო ლიდერი ფეტულა გიულენი დაასახელა და მისი ორგანიზაცია ტერორისტული ორგანიზაციების სიაში შეიყვანა. თურქეთის ხელისუფლების მოთხოვნით, არაერთმა სახელმწიფომ დახურა გიულენის ჩაღლარის საგანმანათლებლო ქსელში შემავალი დაწესებულებები.