მოძრაობა "ხმა" საჯარო სამსახურის კანონში შეტანილ ცვლილებებს ეხმაურება და სოციალურ ქსელში აქვეყნებს განცხადებას, სადაც გაფიცვის ლეგიტიმურ საფუძვლებზე საუბრობს და განმარტავს, რომ კანონში შეტანილი ამგვარი დაუსაბუთებელი ცვლილებები დასაქმებულს უქმნის შესაძლებლობას კანონიერად გაიფიცოს.

განცხადებაში ასევე აღნიშნულია, რომ მოძრაობა მხარს დაუჭერს ამგვარ ძალისხმევას — მათ ხელთ არსებული ყველა რესურსით.

"ჩვენ ბევრმა საჯარო მოხელემ გვკითხა გაფიცვაზე. მათთვის მნიშვნელოვანია იმის ცოდნა, არსებობს თუ არა გაფიცვის კანონიერი შესაძლებლობა.
მიიჩნევა, რომ საქართველოში გაფიცვა შრომით ურთიერთობას უნდა უკავშირდებოდეს და პოლიტიკურ საკითხზე გაფიცვა უკანონო გაფიცვაა. რას ნიშნავს პოლიტიკური საკითხი, ეს განმარტების საკითხია.
შრომის საერთაშორისო ორგანიზაცია მიიჩნევს, რომ დასაქმებულებს უფლება აქვთ, გაიფიცონ იმ სოციალური და ეკონომიკური საკითხების გარშემო, რომლებსაც პირდაპირი გავლენა აქვთ მათ სოციალურ დაცვაზე, დასაქმების პოლიტიკაზე, ცხოვრების სტანდარტებზე. ამავე დროს, შრომის საერთაშორისო ორგანიზაციის სტანდარტით, ნებადართულია გაფიცვა მაშინ, როდესაც მშრომელები იფიცებიან სახელმწიფოს, როგორც დამსაქმებლის წინააღმდეგ.
საჯარო სამსახურის კანონში შეტანილი ცვლილები ასეთ ფართო შრომით და სოციალურ საკითხს წარმოადგენს. სახელმწიფო, როგორც დამსაქმებელი, ცვლის საჯარო მოხელის დაცვის სტანდარტებს - ამარტივებს რეორგანიზაციის დროს თვითნებურ გათავისუფლებას, ამკაცრებს დისციპლინას და აუქმებს პროფესიული საჯარო მოხელეებისთვის განკუთვნილ პოზიციებს. ამიერიდან პარტიას შეეძლება ყველა ხელმძღვანელ პოზიციაზე კონკურსის გარეშე დანიშნოს მისთვის სასურველი პირი.
ეს ცვლილება გაფიცვის კანონიერი საფუძველია ყველა საჯარო მოსამსახურისთვის და წარმოადგენს აღმძრავ ღვედს იმისთვის, რომ ამასთან ერთად საჯარო მოსამსახურეებმა საგაფიცვო მოთხოვნებს შორის დააყენონ მათთვის მწვავე საკითხებიც: ხელფასების უთანასწორობა, უსამართლო პრემიების სისტემა, უმუშევრობის დაზღვევის არარსებობა და სხვა.
ჩვენ მხარს დავუჭერთ ასეთ ძალისხმევას - საჯარო მოხელეთა პროფკავშირის შექმნით დაწყებული გაფიცვით დამთავრებული," — წერია განცხადებაში