ხულოს კლინიკაში დასაქმებული ექთნები საერთო მიმართვას ავრცელებენ. მათი ინფორმაციით, კლინიკის მენეჯმენტს ექთნების გრაფიკის შეცვლა სურს. ამის შესახებ ბათუმელები წერს.

"უნდათ ყოველ მე-8 დღის მორიგეობაზე გადაგვიყვანონ. თერაპია, ქირურგია და ბავშვთა გაერთიანებული განყოფილება გვაქვს მე-2 სართულზე, სადაც მუშაობს ერთი ექთანი. მე ამ განყოფილებაში ვმუშაობ. ცალკეა სამშობიარო განყოფილება მე-3 სართულზე, რომელსაც აქამდე ცალკე ექთანი ჰყავდა. ორივე განყოფილებას ერთი სანიტარი ჰყავს. ახლა უნდათ, რომ ამ განყოფილებებში მხოლოდ ერთი ექთანი დატოვონ, რაც ჩვენთვის მიუღებელია. დღეს უკვე მოგვცეს გრაფიკი, რისი მიხედვითაც ყოველ მე-8 დღეს უნდა ვიმორიგეოთ", — ამბობს ხულოს კლინიკის ექთანი, გუგული კახაძე.

ვიდეომიმართვაში, რომელსაც ბათუმელები ავრცელებს, ერთ-ერთი ექთანი კლინიკის ადმინისტრაციას აფრთხილებს, რომ თუ ძველი სამუშაო გრაფიკი არ შეუნარჩუნდებათ, გაიფიცებიან.

"ვაპროტესტებთ, გავდივართ ქუჩაში. ისეთ პროტესტს დავიწყებთ, როგორც ქრიან თბილისის ქუჩებში გამოსულები. თუმცა არც იქ დაგვიკლია ჩვენი გამოსვლები და ჩვენი მიწოდებული ხმები. თუკი დაკმაყოფილება არ იქნება, ყველანაირ ზომებს მივმართავთ", — ამბობს ხულოს კლინიკის ექთანი.