მეტროში ახალგაზრდის ცემაში ბრალდებული ორი კაცი, თბილისის საქალაქო სასამართლომ გირაოთი გაათავისუფლა. გადაწყვეტილება მოსამართლე ლევან გელოვანმა მიიღო, რომელმაც მიიჩნია, რომ 2000-ლარიანი გირაო დააზღვევდა მათგან ხელახალი დანაშაულის ჩადენის რისკებს.

"შელაპარაკების დროს შეურაცხყოფა მიაყენეს დაზარალებულს. კერძოდ, ხელი დაარტყეს სახის არეში, ასევე ერთ-ერთმა ბრალდებულმა მოუჭირა ყელის არეში. ამ ყველაფერმა ერთობლიობაში გამოიწვია დაზარალებულის ფიზიკური ტკივილი", — თქვა საქმის პროკურორმა.

ამასთან, პროკურორმა მოსამართლეს დანაშაულის ჩადენის საფრთხის შესახებ უთხრა, თუმცა ამის მიუხედავად, გიგა შუბითიძისა და აკაკი ფიჩხაურისთვის პატიმრობის შეფარდების საკითხი არც კი დაუყენებია.

რადიო თავისუფლება წერს, რომ პროკურორის თხოვნის მიუხედავად, 3000-ლარიანი ჯარიმის დაკისრების თაობაზე, მოსამართლემ ბრალდებულის მოთხოვნა გაითვალისწინა, მათ "შეღავათი გაუწია" და 2000-ლარიანი გირაო შეუფარდა. ამ თანხის გადასახდელად მათ 30-დღიანი ვადა აქვთ.

შეგახსენებთ, 16 დეკემბერს, გამოცემა "მაუწყებელმა" ვიდეო გაავრცელა, რომელშიც ჩანს, რომ შავებში ჩაცმული ორი პირი ვაგონში მყოფ ახალგაზრდას ფიზიკურად უსწორდებიან.

უწყებაში ამბობდნენ, რომ გამოძიება დაწყებული იყო მეტროში მომხდარ ძალადობის შემთხვევაზეც სისხლის სამართლის კოდექსის 126-ე მუხლით (ჯგუფური ძალადობა).

ცნობისთვის, უკვე 22-ე დღეა, რაც საქართველოს მასშტაბით, სხვადასხვა ქალაქებში მრავალრიცხოვანი პროევროპული აქციები იმართება. დემონსტრანტების პროტესტი "ქართული ოცნების" გადაწყვეტილებას მოჰყვა, რომლებმაც 28 ნოემბერს განაცხადეს, რომ საქართველო 2028 წლის ბოლომდე დღის წესრიგში არ დააყენებს ევროკავშირში გასაწევრიანებლად მოლაპარაკებების გახსნის საკითხს.

ამასთან, 28 ნოემბრიდან მოყოლებული, პოლიციამ აქციის 400-ზე მეტი მონაწილე დააკავა, მათ შორის, სისხლის სამართლის წესით დააკავეს 30-ზე მეტი პირი, რომელთაც რამდენიმე წლიანი პატიმრობა ემუქრებათ. მათ რიცხვში არიან საზოგადოებისთვის ცნობილი სახეებიც.

აღსანიშნავია, რომ სასამართლომ ადმინისტრაციული წესით დაკავებულ არაერთ აქციის მონაწილეს შეუფარდა ადმინისტრაციული პატიმრობა. რამდენიმე დღიან პატიმრობაში იმყოფებოდნენ ოპოზიციონერი პოლიტიკური ლიდერებიც, მათ შორის ნიკა გვარამია და ალეკო ელისაშვილი.

ხაზგასასმელია ის ფაქტიც, რომ დაკავებულთა შორის არ არიან პოლიციელები, მათ შორის ისინიც, ვინც ჟურნალისტებზე პირდაპირ ეთერში მუშაობის დროს იძალადეს.