ახალქალაქში, სოფელ კოხის ტყეში ხანძარი ლოკალიზებულია, თუმცა ცეცხლი ჯერ არ ჩამქრალა. ამის შესახებ ინფორმაცია On.ge-ს საგანგებო სიტუაციების მართვის სამსახურის პრესსამსახურში მიაწოდეს.

უწყების ინფორმაციით, ხანძრის ჩასაქრობად ათეულობით მეხანძრე-მაშველი და ხანძარსაწინააღმდეგო ტექნიკა მუშაობს.

"რთული რელიეფის მიუხედავად, მეხანძრე მაშველების დროული და ეფექტური რეაგირების შედეგად, ორი-სამი ჰექტარი ფართობზე გავრცელებული ხანძრის ლოალიზება უმოკლეს დროში მოხდა. ამჟამად, მიმდინარეობს ხანძრის ცალკეული კერების ლიკვიდირება. ცეცხლის გავრცელების საშიშროება აღარ არსებობს", - აღნიშნავენ საგანგებო სიტუაციების მართვის სამსახურში.

სოფელ კოხში ხანძრის გაჩენის შესახებ ინფორმაცია დაახლოებით სამი საათის წინ გავრცელდა. დღესვე ხანძარი გაჩნდა ახალციხეში, სოფელ სვირის ტყეშიც. აქ ხანძარი ამ დრომდე ლოკალიზებული არაა.