საიას თავმჯდომარე ოცნების პარლამენტის მიერ დაინიცირებულ საგანგაშო საკანონმდებლო ცვლილებებზე საუბრობს. ნონა ქურდოვანიძის განმარტებით, მოსალოდნელია არადემოკრატიული და რეპრესიული შინაარსის ცვლილებები.

"თვითგამოცხადებულ პარლამენტში ქართულმა ოცნებამ პირველივე კვირაში ერთდროულად რამდენიმე კანონში დააინიცირა არადემოკრატიული და რეპრესიული შინაარსის ცვლილებები. მათი განხილვა და მიღება ავტორებმა დაჩქარებული ან გამარტივებული წესით მოითხოვეს და პირველი მოსმენით უკვე დაუჭირეს მხარი.
ცვლილებები შედის:
1. სარჩევნო კოდექსში
2. საჯარო სამსახურის შესახებ კანონში
3. პოლიციის შესახებ კანონში
4. შეკრებებისა და მანიფესტაციების შესახებ კანონში
5. ადმინისტრაციულ სამართალდარღვევათა კოდექსში
6. სახელმწიფო დაცვის სპეციალური სამსახურის შესახებ კანონი
სამართალდარღვევათა კოდექსს ემატება ახალი სამართალდარღვევები. ასევე, უკვე არსებული სანქციები მკაცრდება.
1. სატრანსპორტო მოძრაობის შეფერხებისთვის ჯარიმა იზრდება 1000 ლარიდან 2000 ლარამდე — ამ მუხლს აქტიურად იყენებენ აქციაში მონაწილე ბაიკერების წინააღმდეგ;
2. ქალაქის იერსახის დაზიანებისთვის ჯარიმა 50 ლარიდან იზრდება 1000 ლარამდე — ამ მუხლს აქტიურად იყენებენ აქტივისტების წინააღმდეგ, მათ მიერ გაკეთებული სტენსილების და სხვა საპროტესტო წარწერების გამო;
3. შეკრებებისა და მანიფესტაციების ნორმების დარღვევისთვის ჯარიმა იზრდება 500 ლარიდან 5000 ლარამდე, ორგანიზატორებისთვის 5000 ლარიდან — 15,000 ლარამდე — ამ მუხლს აქტიურად იყენებენ აქციის იმ მონაწილეების წინააღდეგ, ვისაც გზის გადაკეტვას ედავებიან;
4. შსს-ის უნიფორმის უკანონოდ ტარებაზე წესდება 2000-ლარიანი ჯარიმა და ატრიბუტიკის კონფისკაცია;
5. მშობლის ან ბავშვის სხვა კანონიერი წარმომადგენლის მიერ არასრულწლოვანის აღზრდისა და სწავლების ან მის მიმართ სხვა მოვალეობათა შეუსრულებლობას ემატება ამავე კოდექსის 173-ე მუხლით გათვალისწინებული ქმედების ჩადენა (სამართალდამცავი ორგანოს თანამშრომლის კანონიერი მოთხოვნის დაუმორჩილებლობა). აღსანიშნავია, რომ პოლიცია, როგორც წესი, სწორედ 173-ე მუხლს იყენებს დემონსტრანტების უსაფუძვლო დაკავებისას.
5. აქციაზე ნიღბებისა და გარკვეული ტექნიკური საშუალებების გამოყენებისათვის წესდება 2000 ლარიანი ჯარიმა;
6. ცვლილებები ასევე აფართოებს იმ საფუძვლებს, რომელთა გამო შესაძლებელია პირის დაკავება, ნივთების ან დოკუმენტების ჩამორთმევა", — წერს ნონა ქურდოვანიძე.