მარტვილის კანიონთან ტურისტული ინფრასტრუქტურა მოეწყო (ფოტო)

მარტვილის მუნიციპალიტეტის გამგეობის ინფორმაციით, მდინარე აბაშის კანიონზე ინფრასტრუქტურის მოწყობის სამუშაოები მალე დასრულდება. პროექტის ფარგლებში ბუნების ძეგლზე აშენდა ვიზიტორთა ცენტრი, ასევე მოეწყო ტურისტული ბილიკები, ხიდები, ნავმისადგომები და გადასახედები. რესტავრაცია ჩაუტარდა ქვაში ნაკვეთ დადიანების ისტორიულ კიბესა და წყლის წისქვილს.

როგორც გამგეობის მიერ გავრცელებულ ინფორმაციაში აღნიშნული, კანიონის სანაოსნო მონაკვეთზე სარეკონსტრუქციო სამუშაოების დასრულებისთანავე შეიქმნება სპეციალური ელექტრონული სისტემა, რომლის საშუალებით ვიზიტორები შეიძენენ ბილეთებს და მოწესრიგდება რიგები. ინფრასტრუქტურული სამუშაოები სახელმწიფო ბიუჯეტიდან ფინანსდება და ჯამში 1 242 000 ლარი დაიხარჯება. სამშენებლო სამუშაოები ივლისის დასაწყისში დასრულდება და დასრულებისთანავე კანიონზე ტურისტული სეზონი გაიხსნება.