მამუკა ხაზარაძე ტვ პირველის ჟურნალისტსა და ოპერატორზე თავდასხმის ფაქტს ეხმაურება და აცხადებს, რომ მოძალადეები ბიძინა ივანიშვილის მიერ არიან წაქეზებულები.

"გუშინ ჩვენ ვნახეთ სახელმწიფოს მიერ წაქეზებული და კერძოდ, ბიძინა ივანიშვილის მიერ წაქეზებული, სახელმწიფოს ხელშეწყობით ჩატარებული, კრიმინალების სპეცოპერაცია. ჩვენ მივედით იმ ზღვარზე, სადაც ე.წ. მიტაცებული არჩევნების შემდეგ, არალეგიტიმურმა ხელისუფლებამ მთლიანად ნიღაბი ჩამოიხსნა. ბიძინა ივანიშვილმა ნიღაბი ჩამოიხსნა და ქართველ ხალხს მისი რეალური სახე აჩვენა. საზოგადოებამ, რომელსაც გამოვლილი გვაქვს 90-იანი წლები, გუშინ, იხილა ზუსტად იგივე სურათი, როცა კრიმინალური ბანდები და 'ზონდერები' შურისძიების წყურვილით ადამიანებს ასახიჩრებდნენ, სცემდნენ უმოწყალოდ და განსაკუთრებით, ჟურნალისტებს. ეს არის ის მომენტი, როცა პოლიცია არის გაჩუმებული, ამ დანაშაულს უყურებს და ხმას არ იღებს", — ამბობს "ძლიერი საქართველოს" ერთ-ერთი ლიდერი, მამუკა ხაზარაძე.

მან პოლიციელების უმოქმედობაზეც გააკეთა განცხადება და მათ მოუწოდა, რომ ამ პროცესებს გაემიჯნონ.

"პოლიციაში არსებობენ ღირსეული ადამიანები, რომლებიც სამშობლოს ემსახურებიან, მათ დადებული აქვთ ფიცი და აქვთ ღირსება თავიანთი მუნდირის წინაშე. დარწმუნებული ვარ, უამრავი ასეთი ადამიანი გულში აპროტესტებს იმას, რაც მოხდა. რაც შეეხება პოლიციის მეორე ნაწილს, რომელიც პირდაპირ ჩართულია გომელაურის ხელმძღვანელობით ამ კრიმინალის აღზევებაში და პოლიტიკური ოპონენტების, გულანთებული ახალგაზრდა ადამიანების დაშანტაჟებაში, გალახვაში, დასახიჩრებაში — აი, ეს მეორე ნაწილი, რომელიც პირდაპირ არის ჩართული, ყველა მკაცრი კანონით აგებს პასუხს, მაგრამ ის ნაწილი, რომელიც გულში და სამეგობროში წუხს, მათ მოვუწოდებ, რომ ეს სიჩუმე, თუ დიდხანს გაგრძელდა, ისეთივე დამნაშავეები იქნებით და ისეთივე ხელშემწყობი ამ კრიმინალური აღზევების, როგორც ის მეორე ნაწილი, რომელიც ამას ასრულებს. ამიტომ ძალიან მკაფიოდ მოგიწოდებთ, პატივს ვცემ თქვენ მიერ ნაომარს, ნაშრომს, მოქალაქეების დაცვისკენ მიმართულ ყველა გამოძიებას და ა.შ. რასაც პატიოსნად ასრულებდით (ამ შემთხვევაში, ვსაუბრობ პოლიციელების იმ ნაწილზე, ვისაც ეს სიტყვები ეკუთვნის) — ხმა ამოიღეთ, გაემიჯნეთ და საზოგადოებას აჩვენეთ, რომ ის ხელფასები, რომელსაც ჩვენი ბიუჯეტიდან იღებთ, არის ღირსი, რომ თქვენს ოჯახებში შევიდეს. სხვა შემთხვევაში, თქვენ იქნებით ამ კრიმინალური დანაშაულის თანამონაწილეები", — განაცხადა მამუკა ხაზარაძემ.

პოლიტიკოსს არ გამორჩენია ბიძინა ივანიშვილიც, რომელსაც, მისი თქმით, სურს, რომ საქართველო რუსეთის გუბერნიად აქციოს.

"ბიძინა ივანიშვილის პოლიტიკაა, რომ საქართველო აქციოს რუსეთის გუბერნიად და ამ ქვეყანაში თავისუფალმა ხალხმა იცხოვროს მისი კანონებით და ტერორის ქვეშ. გუშინ, რუბიკონი იქნა გადალახული, გუშინ ჩვენ ქუჩაში ფაქტობრივად ვნახეთ ტერორისტული აქტი ქართველი ხალხის წინააღმდეგ ბიძინა ივანიშვილს მოვუწოდებთ — თუ უახლოესი 24 საათის განმავლობაში არ გამოხვალ და არ დაგმობ ამ ფაქტს, იმ კრიმინალებს არ დაიჭერ, ქვეყანასა და საზოგადოებას არ აჩვენებ, რომ ემიჯნები და საქართველოში არსებობს კანონი, პოლიცია, სამართალი და სამართალდამცავი ორგანოები, თუ ამას არ გააკეთებ, 24 საათის განმავლობაში, იმიტომ, რომ (მთელმა საზოგადოებამ იცის ვინ არიან ეს 'ზონდერები'), მთელი პასუხისმგებლობა გეკისრება შენ პირადად. შენ, როგორც რუს ადამიანს, რომელიც ჩამოსულია საქართველოში იმისთვის, რომ საქართველო რუსეთში შეათრიოს", — თქვა ხაზარაძემ.