რუსული მედიის მიერ გავრცელებული ინფორმაციით, რუსეთის პრეზიდენტმა, ვლადიმერ პუტინმა და ბელარუსის პრეზიდენტმა, ალექსანდრე ლუკაშენკომ უსაფრთხოების გარანტიების შესახებ შეთანხმებას ხელი მოაწერეს.

პუტინისა და ლუკაშენკოს მიერ ხელმოწერილი დოკუმენტი განსაზღვრავს: რუსეთისა და ბელარუსის თავდაცვის, სუვერენიტეტის, ტერიტორიული მთლიანობის და ხელშეუხებლობის უზრუნველყოფის და დამოუკიდებლობისა და კონსტიტუციური წესრიგის დაცვის ორმხრივ ვალდებულებას.

როგორც პუტინი აცხადებს, ეს შეთანხმება "შესაძლებელს გახდის რუსეთისა და ბელარუსის უსაფრთხოების საიმედოდ დაცვას".

რუსეთის პრეზიდენტმა ხაზგასმით აღნიშნა რომ ყველა საშუალების გამოყენება იქნება შესაძლებელი შეთანხმებაში აღნიშნული ამოცანების გადასაწყვეტად და აღნიშნა, რომ მომავალი წლის მეორე ნახევარში ბელარუსში შესაძლოა, "ორეშნიკის" ბალისტიკური რაკეტა განათავსოს.