სამხრეთ კორეის პრეზიდენტმა იუნ სოკ იოლმა ქვეყანაში სამხედრო მდგომარეობა გამოაცხადა. მან გადაწყვეტილების მიღების მიზეზად ოპოზიციის მიერ "ანტისახელმწიფოებრივი ქმედება და გადატრიალების მცდელობის დაგეგმვა" დაასახელა.

"სამხედრო მდგომარეობის მიზანი პრო-ჩრდილოკორეული ძალების ამოძირკვა და თავისუფლების კონსტიტუციური წესრიგის დაცვაა", — ამის შესახებ სატელევიზიო მიმართვაში სამხრეთ კორეის პრეზიდენტმა განაცხადა.

მისი თქმით, ოპოზიციურ პარტიებს სურთ, რომ ქვეყანა კრიზისში ჩაითრიონ და დასძინა, რომ მათ საპარლამენტო პროცესი "მძევლად აიყვანეს".

ცნობისთვის, ოპოზიციურმა დემოკრატიულმა პარტიამ მხარი არ დაუჭირა საბიუჯეტო კომიტეტში მთავრობის ბიუჯეტის წარმოდგენილ დოკუმენტს და მისი მკვეთრად შემცირება მოითხოვა. ამასთან, პარტიამ სახელმწიფო აუდიტისა და გენერალური პროკურორის იმპიჩმენტის საკითხი დააყენა.

კორეულ მედიებზე დაყრდნობით, სეულში, პარლამენტის შენობის შესასვლელი ჩაკეტეს. დემოკრატიული პარტიის ლიდერმა და ყოფილმა საპრეზიდენტო კანდიდატმა, ი ჯე მიონგმა მოსახლეობას უკვე მიმართა და მათ პარლამენტის შენობასთან მისვლისკენ მოუწოდა.