რესპუბლიკურ პარტიაში მიიჩნევენ, რომ სამართალდამცავები ხელისუფლების ინტერესებს ემსახურებიან და მოქალაქეებზე რეპრესიების განხორციელების მანქანები არიან. პარტიამ განცხადება საქართველოს რკინიგზასთან 10 აქტივისტისა და ლგბტ აქტივისტების ლევან ბერიანიძისა და თორნიკე კუსიანის დაკავების შესახებ გაავრცელეს.

"როდესაც ქვეყანაში სამართალდამცავი სტრუქტურები ემსახურებიან ხელისუფლების ინტერესებს, როდესაც ჰომოფობია იმდენადაა სტრუქტურაში ფესვგადგმული, რომ მხოლოდ ამ მიზეზით, არსებულ სისტემას შეუძლია ადამიანები გაიმეტოს, დაუშვებელია სამოქალაქო საზოგადოების უმოქმედობა. ჩვენ, ყველამ ერთად აქტიურად უნდა ვიბრძოლოთ არსებული მახინჯი სისტემის შეცვლისთვის", - ვკითხულობთ პარტიის მიერ გავრცელებულ განცხადებაში.

რესპუბლიკური პარტია გმობს ჰომოფობიას და პროკურატურისგან მოითხოვს მყისიერად დაიწყოს ლგბტ აქტივისტების დაკავების საქმის გამოძიება.

"დაუყოვნებლივ დადგეს იმ პოლიციელების პასუხისმგებლობის საკითხი, რომლებიც ჰომოფობიის ნიადაგზე მოქალაქეების შეურაცხყოფაში არიან ეჭვმიტანილი", - დასძენენ პარტიაში.

25 აგვისტოს, გამთენიისას, ბათუმის ბულვარში პოლიციამ თანასწორობის მოძრაობის აღმასრულებელი დირექტორი ლევან ბერიანიძე და ორგანიზაციის წევრი თორნიკე კუსიანი დააკავა. დაკავებულების შსს-ს თანამშრომლებს ფიზიკურ და სიტყვიერ შეურაცხყოფაში ადანაშაულებენ. შსს კი აცხადებენ, რომ "დაუდგენელი პირები და დაკავებულები ერთმანეთს ფიზიკურ და სიტყვიერ შეურაცხყოფას აყენებდნენ", თუმცა ადგილზე მისულ სამართალდამცველებს ბერიანიძე და კუსიანი არ დაემორჩილნენ და პოლიციამ ისინი დააკავა.