სიტორა იუზიფი ორლანდოს გეი კლუბში მომხდარი თავდამსხმელის ომარ მატეენის ყოფილი ცოლია.

ABC News-სთვის მიცემულ ინტერვიუში 27 წლის სიტორამ თქვა, რომ ის შოკირებულია ყოფილი ქმრის თავდასხმით, თუმცა მისი ხასიათის საშიში ნიშნები დიდი ხნის წინ ჰქონდა შემჩნეული:

"ერთი წუთის განმავლობაში ის იყო ჩვეულებრივი, ბედნიერი და ხუმარა, მეორე წუთს კი აგრესიული და სრულიად საპირისპირო. ბრაზი მას ემოციურ და ფიზიკურ მოძალადედ აქცევდა".

იუზიფის თქმით, ის არაერთხელ გამხდარა მისი ძალადობის მსხვერპლი.

"მისი პიროვნება ავადმყოფური იყო" -თქვა მან. იუზიფმა გაიხსენა, რომ ყოფილი ქმრის სახლიდან ის თავისმა მშობლებმა წამოიყვანეს, რადგან ის მისგან თავის დაღწევას ვერ ახერხებდა.

მატეენის დახასიათებისას მან თქვა, რომ ის თავად რელიგიური ადამიანი იყო, თუმცა განსხვავებული რელიგიის და კულტურის ადამიანების მიმართ აგრესიას ავლენდა:

"თუნდაც მაშინ, როდესაც ემოციურად სტაბილური იყო, მოულოდნელად აგრესიული ხდებოდა ჰომოსექსუალების ან განსხვავებული კულტურის მქონე ადამიანების დანახვისას. ისლამი არც ისე ტოლერანტულია ჰომოსექსუალების მიმართ".

გუშინ ფლორიდაში, გეი კლუბ პულსში მომხდარ თავდასხმას 50 ადამიანი ემსხვერპლა, 53 დაჭრილი კი საავადმყოფოშია გადაყვანილი. თავდამსხმელი ომარ მატეენი, რომელიც პოლიციამ ადგილზე მოკლა, ISIS-ის სახელით მოქმედებდა.