ოცნების ხელისუფლების პრემიერის, ირაკლი კობახიძის თქმით, სხვადასხვა საჯარო სამსახურებისა და საგანმანათლებლო დაწესებულებების თანამშრომელთა ნაწილის პროტესტის იმის დასტურია, რომ მათ წაკითხულის გააზრება უჭირთ, რაც პრობლემაა.

"აშკარად გამოიკვეთა, ის რაც PISA-ს ტესტებით დასტურდებოდა, რომ საქართველოში არის წაკითხულის გააზრების სერიოზული პრობლემა. როდესაც რიგითი ადამიანი ვერ იაზრებს წაკითხულს ან მოსმენილს, ეს შეიძლება კიდევ იყოს ნაკლები პრობლემა, მაგრამ როდესაც წაკითხულის გააზრება უჭირთ კონკრეტულ საჯარო მოსამსახურეებს ან პედაგოგებს სკოლებში ან უმაღლეს საგანმანათლებლო დაწესებულებებში, ეს, რა თქმა უნდა, კიდევ უფრო დიდი პრობლემაა", — განაცხადა კობახიძემ მთავრობის სხდომაზე.

პრემიერმა იმ ადამიანებს, ვისაც პროტესტი გაუჩნდა დისკუსიები შესთავაზა.

"მინდა შევთავაზო ყველას, ვისაც გაუჭირდა წაკითხულის ან მოსმენილის გააზრება, ყველასთან ჩვენ მზად ვართ დისკუსიისთვის, აბსოლუტურად ყველასთან ვართ მზად დისკუსიისთვის, თუმცა, აქაც იმედი ნაკლებად შეიძლება გვქონდეს", — თქვა კობახიძემ.