თუ სახელმწიფო ხარ, ამ ადამიანს რატომ არ აკავებ? დააპატიმრე, დააკავე და მიუსაჯე, რომ მერე სხვა ჯარისკაცმა ან პოლიციელმა მსგავსი რამე აღარ იკადროს, — ასე ეხმაურება ვაკის მაცხოვრის ფერისცვალების სახელობის ტაძრის წინამძღვარი შალვა კეკელია 30 ნოემბერს რუსთაველზე აქციის 23 წლის მონაწილის, ზვიად მაისაშვილის სპეცრაზმის მიერ ცემას.
მისი თქმით, წინა მთავრობასთან იმიტომ ჰქონდა ხალხს პრობლემა, რომ საშინლად იქცეოდნენ და როცა ახლაც იგივე ხდება, ეს არის საშინელება.

"საშინელი კადრი ჩამიგდეს. ადამიანი წაქცეულია და ადამიანი ფეხს ურტყამს და მერე მეორე ჯარისკაციც კიდევ მიდის და კიდევ ურტყამს. წინა მთავრობასთან იმიტომ გვქონდა პრობლემა, რომ საშინლად იქცეოდნენ ის ადამიანები, შენც რომ ისე იქცევი, ეს არის საშინელება. წაიქცა ადამიანი, კიდევ ურტყამ, რა გინდა? გინდა, რომ ადამიანი მოკვდეს და კიდევ ერთმანეთის ხოცვა-ჟლეტა დაიწყონ ამ ქალაში? ჩემთვის ეს ყველაფერი, რაც ახლა ხდება, რასაც ახლა ვუყურებ, მე ვერ წარმომიდგენია რომ სახელმწიფომ, იქ ხომ ჩანს რომელი პოლიციელია, რომელია, ვინც ასე იქცევა. თუ სახელმწიფო ხარ, ამ ადამიანს რატომ არ აკავებ? დააპატიმრე, დააკავე და მიუსაჯე, რომ მერე სხვა ჯარისკაცმა ან პოლიციელმა მსგავსი რამე აღარ იკადროს. ეს ყველაფერი დაუსჯელობის სინდრომიდან გამომდინარეობა. ამ საქციელის გამო რომ არ დაისაჯა, მერე შედეგად ასეთი რაღაცები ხდება. უნდა ამაზე ადამიანს მოსთხოვო პასუხი", — აცხადებს მამა შალვა კეკელია.