საკონსტიტუციო სასამართლო თეა წულუკიანის განცხადებას იმასთან დაკავშირებით, რომ სასამართლო რუსთავი 2-ს საქმის სარჩელებს დაჩქარებული წესით, რიგითი მოქალაქეებისას კი გაჭიანურებულად განიხილავს, პასუხობს და განმარტავს, რომ აღნიშნული განცხადებები მიზნად საკონსტიტუციო სასამართლოს დისკრედიტაციის ისახავს და მოსამართლეების პოლიტიკურ დებატებში ჩართვის მცდელობაა.

სასამართლო აცხადებს, რომ წულუკიანის განცხადებები არა მხოლოდ უპასუხისმგებლო და უსაფუძვლოა, არამედ შეუფერებელია მისი თანამდებობისთვის:

"იუსტიციის მინისტრი წარმოადგენს აღმასრულებელი ხელისუფლების მაღალი თანამდებობის პირს და მისი განცხადებები აღიქმება სასამართლოზე და კონკრეტულ მოსამართლეებზე ზეწოლის მცდელობად. გამოვთქვამთ იმედს, რომ გამოთქმული მოსაზრებები არ წარმოადგენს საქართველოს მთავრობისა და მისი ხელმძღვანელის პოზიციას".

იუსტიციის მინისტრმა განაცხადა, რომ რიგითი მოქალაქეები 2013 წლიდან ელოდებიან თავიანთი სარჩელების განხილვას მაშინ, როდესაც რუსთავი 2-ის, გიგი უგულავას და კაბელების საქმეებს სასამართლო დაჩქარებული წესით განიხილავს:

"როდესაც რიგითი მოქალაქეები ჩივიან, 2013, 2014, 2015 წლიდან ელოდებიან ისინი ან პასუხს, მიიღებენ თუ არ არა მათ სარჩელს არსებითად განსახილველად, ან არსებითად განსახილველად უკვე არის მიღებული სარჩელი და არ დგება სამართლებრივი შედეგი. ეს ხდება მაშინ, როდესაც, მაგალითად, რუსთავი 2-ის დავებს 6-7 დღეში იხილავს საკონსტიტუციო სასამართლოს იგივე პირველი კოლეგია და რამდენიმე დღეში აჩერებს ხოლმე კანონმდებლობის ამა თუ იმ ნორმას".