2024 წლის 21 ნოემბერს, სადამკვირვებლო მისია ჩემი ხმის წევრმა ორგანიზაციებმა საერთაშორისო გამჭვირვალობა — საქართველომ და სამოქალაქო საზოგადოების ფონდმა საქართველოს საკონსტიტუციო სასამართლოში გააგზავნეს სასამართლოს მეგობრის მოსაზრება, რომელიც შეეხება საქართველოს პრეზიდენტის კონსტიტუციურ სარჩელს საქართველოს პარლამენტისა და აჭარის ავტონომიური რესპუბლიკის უმაღლესი საბჭოს არჩევნების მომწესრიგებელი ნორმებისა და ამ ნორმების საფუძველზე ჩატარებული 2024 წლის 26 ოქტომბრის არჩევნების კონსტიტუციურობის შესახებ.

სასამართლოს მეგობრის მოსაზრების ავტორები იზიარებენ პრეზიდენტის კონსტიტუციური სარჩელის ძირითად პოზიციებს იმის თაობაზე, რომ პარლამენტის 2024 წლის 26 ოქტომბრის არჩევნები საქართველოს კონსტიტუციითა და ადამიანის უფლებათა საერთაშორისო სამართლით გარანტირებული საარჩევნო უფლების ძირითადი პრინციპების — არჩევნების საყოველთაობის, თანასწორობის, ფარულობის და ამომრჩევლის ნების თავისუფალი გამოვლენის — უხეში და მასობრივი დარღვევით ჩატარდა, რის გამოც ეს არჩევნები არაკონსტიტუციურად უნდა იქნეს ცნობილი. სასამართლოს მეგობრის მოსაზრება გამყარებულია მასობრივი გაყალბების დამადასტურებელი მრავალრიცხოვანი მტკიცებულებებით, რომლებიც სადამკვირვებლო მისია ჩემი ხმის დამკვირვებლებმა არჩევნების დღეს შეაგროვეს.