სანტა მონიკას პოლიციამ მძიმედ შეიარაღებული მამაკაცი დააკავა, რომელიც ლოს-ანჯელესის პრაიდზე თავდასხმას გეგმავდა. პოლიციის განცხადებით, აღნიშნულ პიროვნებას ორლანდოში მომხდარ თავდასხმასთან კავშირი არ ჰქონია და დამოუკიდებლად მოქმედებდა.

პოლიციას მამაკაცის შესახებ ინფორმაცია ერთ-ერთმა მოქალაქემ მიაწოდა.

დაკავებულის მანქანიდან სამი ავტომატური შაშხანა, რამდენიმე მჭიდი და 19 ლიტრი ქიმიური ხსნარი ამოიღეს, რომლისგანაც ბრალდებული თვითნაკეთი ბომბის შექმნას გეგმავდა.

"ეჭვმიტანილს გაცხადებული ჰქონდა, რომ ლოს-ანჯელესის პრაიდზე მიდიოდა, თუმცა რას აპირებდა, ამის შესახებ არაფერი უთქვამს", განაცხადა სანტა მონიკას პოლიციის ლეიტენანტმა, სოლ როდრიგესმა.

გამოძიების ფედერალური ბიუროს ცნობით, დაკავებული 20 წლისაა. დამატებითი ინფორმაცია ჯერ არ გამოქვეყნებულა.