გავრცელებული ინფორმაცია შეიცავს ფაქტობრივ სიცრუეს, არის მანიპულაციური და ემსახურება არაჯანსაღი აჟიოტაჟის შექმნას, – წიგნის გამომცემელთა და გამავრცელებელთა ასოციაცია 19 გამომცემლობის მიერ ასოციაციის დატოვებას ეხმაურება. რისი მიზეზიც, მათი თქმით, ამავე ასოციაციის რუსულ რეესტრში რეგისტრაცია გახდა.

"დღეს მედიასაშუალებებით გავრცელდა ინფორმაცია საქართველოს წიგნის გამომცემელთა და გამავრცელებელთა ასოციაციიდან წევრთა ნაწილის გასვლის თაობაზე. მალე გამოვაქვეყნებთ დეტალურ განმარტებას ამ საკითხზე. მანამდე კი ვიტყვით, რომ, სამწუხაროდ, გავრცელებული ინფორმაცია შეიცავს ფაქტობრივ სიცრუეს, არის მანიპულაციური და ემსახურება არაჯანსაღი აჟიოტაჟის შექმნას.

გვინდა ხაზგასმით აღვნიშნოთ: ჩვენი ასოციაცია ბიზნეს-სუბიექტების პროფესიული გაერთიანებაა, რომელიც ყოველთვის აფიქსირებდა მოსაზრებებს ქვეყნისთვის მნიშვნელოვან საკითხებთან მიმართებაში. სრულიად დაუშვებლად მიგვაჩნია ასოციაციის გამოყენება პოლიტიკური ბრძოლის ინსტრუმენტად, მით უფრო, რომ ასოციაცია აერთიანებს განსხვავებული შეხედულებებისა და პოზიციების მქონე ორგანიზაციებს. რა თქმა უნდა, ასოციაციის თითოეულ წევრს შეუძლია ინდივიდუალური გადაწყვეტილების მიღება, თუმცა მოვუწოდებთ ყველას, თავი შეიკავონ ასოციაციის რეპუტაციის დაზიანების განზრახვისგან", — ნათქვამია გავრცელებულ ინფორმაციაში.