ნიდერლანდებში, ამსტერდამში, ათობით პირმა, რომლებიც შეიარაღებული იყვნენ ჯოხებით და პეტარდებით — ტრამვაის ცეცხლი წაუკიდეს. ჩალეწილია ტრამვაის ფანჯრებიც.

პოლიციის ინფორმაციით, ცეცხლი მალევე ჩააქრეს, ხოლო მასობრივი არეულობის აღმკვეთმა პოლიციელებმა რამდენიმე პირი დააკავეს.

პოლიციის სპიკერის ცნობით, ტრამვაი ცარიელი იყო და შემთხვევის შედეგად არავინ დაშავებულა.

ადგილობრივი ტელევიზიის მიერ ნაჩვენებ კადრებში ჩანს, რომ ადამიანები ფეიერვერკებს, ბოძებსა და ხის სტელაჟებს ისროდნენ. ამასთან, ჩანს რომ არეულობაში მონაწილეები აზიანებდნენ საკუთრებას და პეტარდებს აფეთქებდნენ.

პოლიციის თქმით გასული კვირის ისრაელელ ფეხბურთის გულშემატკივრებთან შეტაკების შემდეგ ქალაქში დაძაბული ატმოსფეროა, თუმცა მაინც გაურკვეველია ეს არეულობა უკავშირდება თუ არა ამ შემთხვევას.

შეგახსენებთ, რომ 7 ნოემბერს, ღამით ამსტერდამში ისრაელური საფეხბურთო გუნდის, მაკაბი თელ-ავივისა და ნიდერლანდური გუნდის აიაქსის მატჩი ჩატარდა.

გავრცელებული ინფორმაციით, შეტაკება იმის შემდეგ მოხდა, რაც ისრაელელმა "ულტრასებმა" პალესტინაში არსებული ომის შესახებ უხამსი წამოძახილები და ქალაქში არსებული პალესტინური დროშების ჩამოხევა დაიწყეს.

გაიგე მეტი ამ თემაზე:

ისრაელელი "ულტრასების" ქმედებებს ნიდერლანდებში შეტაკება მოჰყვა — კადრები ამსტერდამიდან