ოკუპირებული აფხაზეთის დე ფაქტო პარლამენტმა „მრავალფუნქციური კომპლექსების სამართლებრივი სტატუსის მოწესრიგების შესახებ" კანონი მიიღო.

შეგახსენებთ, რომ 30 ოქტომბერს რუსეთმა და ოკუპირებულმა აფხაზეთმა ხელი მოაწერეს შეთანხმებას, რომელიც რუსულ კომპანიებს ოკუპირებულ აფხაზეთში საინვესტიციო პროექტების განხორციელების საშუალებას აძლევს

როგორც რადიო თავისუფლება წერს, 11 ნოემბერს დამტკიცებულ დოკუმენტში მითითებულია, რომ "მრავალფუნქციური კომპლექსი არასაცხოვრებელი ქონებრივი კომპლექსია, რომელიც შედგება ერთი ან მეტი არასაცხოვრებელი შენობისგან, რომლებიც შედგება სხვადასხვა ფუნქციონალური მიზნებისათვის განკუთვნილი, მხოლოდ არასაცხოვრებელი ფართებისგან".

დოკუმენტის თანახმად, "მრავალფუნქციური კომპლექსი არ შეიძლება მოიცავდეს (მთლიანად და ნაწილობრივ) აპარტამენტებს და ან აპარტჰოტელებს", — ნათქვამია დოკუმენტში.

რაც შეეხება აპარტამენტების მშენებლობის „კანონპროექტს“, ის ოკუპირებული აფხაზეთის ე.წ. პარლამენტიდან ივლისში გაიწვიეს. 25 სექტემბერს კი ოკუპირებულ აფხაზეთში კიდევ ერთი სადავო კანონპროექტი მიიღეს. ე.წ. პარლამენტმა სასამართლო გადაწყვეტილებების ურთიერთ აღიარების შესახებ რუსეთ-აფხაზურ შეთანხმებას მოაწერა ხელი.

შეგახსენებთ, რომ მიმდინარე წლის 3 სექტემბერს ოკუპირებული აფხაზეთის თვითგამოცხადებული რესპუბლიკის ე.წ. საგარეო საქმეთა სამინისტროს ხელმძღვანელმა, სერგეი შამბამ დაადასტურა, რომ რუსეთმა აფხაზეთს დაფინანსება მიმდინარე წლის 1 სექტემბრიდან შეუჩერა და აფხაზურ მხარეს გარკვეული ვალდებულებების შესრულება მოსთხოვა.