ჩრდილოეთ ოსეთის პარლამენტის წევრმა, ძამბოლატ თედეევმა, ოსურ მედიასთან განაცხადა, რომ "სამხრეთ ოსეთისთვის საქართველოსთან დამაკავშირებელი გზის გახსნა სასარგებლო იქნება". ოს დეპუტატს მიაჩნია, რომ ახლა გზის გახსნა რუსეთზეა დამოკიდებული. თუმცა, მისივე თქმით, ეს ფაქტი, პირველ რიგში, "დადებითად აისახება ცხინვალის ბიუჯეტზე".

"2008 წლამდე ჩვენ თავს დაცულად არ ვგრძნობდით, რადგან "ჩვენი უფროსი ძმა" არ იყო ახლოს. დღეს რუსეთმა ჩვენი საზღვრებისა და ჩვენი რესპუბლიკის უსაფრთხოების დაცვის ვალდებულება თავის თავზე აიღო. დღეს იქ მე-4 სამხედრო ბაზაც დგას. ჩვენი სუვერენიტეტი ხელუხლებელი დარჩება, მიუხედავად იმისა, გზა გაიხსნება თუ დაიკეტება", — ამბობს თედეევი.

თედეევმა აღნიშნა, რომ დე ფაქტო რესპუბლიკაში მოსახლეობის გადინება კატასტროფულია და ხალხი სახლებს ტოვებს სამუშაოს არქონისა და ცხოვრების გაძვირების გამო.

თედეევმა სამხრეთ ოსეთის დე ფაქტო რესპუბლიკის პარლამენტში საქართველოსთან გზის გახსნის საკითხის განხილვის შეთავაზებაც გააკეთა.

"მთავარი ამოცანა სამხრეთ ოსეთის მოსახლეობის შენარჩუნებაა. დღეს ჩვენ ეკონომიკური განვითარება გვჭირდება. ასევე, გვჭირდება სამუშაო ადგილების უზრუნველყოფა. პარლამენტში ოთხი პარტიაა. შევკრიბოთ ისინი, გავმართოთ დიალოგი და სამხრეთ ოსეთის მაცხოვრებლები, რომლებიც ოსეთის მიმართ გულგრილები არ არიან, გარედან მოისმენენ და გარკვეულ დასკვნას გამოიტანენ. ჩვენ მოვახდენთ ამის ინიციირებას. ჩვენ ერთად მივალთ კარგ დასკვნამდე" — განაცხადა თედეევმა.