სურსათის ეროვნული სააგენტოს ინფორმაციით, თბილისის მერიის ცხოველთა მონიტორინგის სამსახურიდან ცნობა მიიღეს, რომ ჭიჭინაძის ქუჩა #6 მიმდებარე ტერიტორიიდან, ცხოველთა მუნიციპალურ თავშესაფარში გადაყვანილი ძაღლი მოკვდა.

აღებული პათოლოგიური მასალის გამოკვლევით, სურსათის ეროვნულმა სააგენტომ დაადასტურა ცოფი.

"სააგენტოს თბილისის საქალაქო სამსახურის ვეტერინარმა ინსპექტორებმა, ინფექციის კერაში მყისიერად განახორციელეს კანონმდებლობით გათვალისწინებული ღონისძიებები (ცხოველების ვაქცინაცია) და ცოფით დაავადებულ ძაღლთან შეხებაში მყოფი ცხოველების იდენტიფიცირება, რომლებიც ცხოველთა მონიტორინგის სააგენტოს მიერ ზედამხედველობის მიზნით, გადაყვანილია მუნიციპალურ თავშესაფარში.

ამავდროულად აღნიშნულის შესახებ ეცნობა დაავადებათა კონტროლისა და საზოგადოებრივი ჯანმრთელობის ეროვნული ცენტრს და თბილისის გადამდებ დაავადებათა ეპიდზედამხედველობისა და კონტროლის მუნიციპალურ ცენტრს.

ჩატარებული მოკვლევის შედეგად იდენტიფიცირებულია დაავადებულ ცხოველთან შეხებაში მყოფი 6 პირი, რომლებმაც უკვე მიმართეს სამედიცინო დაწესებულებას. თუმცა, ადგილობრივების განცხადებით, დაავადებულ ცხოველთან კონტაქტში იმყოფებოდა კიდევ რამდენიმე პირი, რომელთა ვინაობაც უცნობია.

აღნიშნულის შესახებ, ეცნობა სამართალდამცავ ორგანოებს", — წერს სააგენტო.

სურსათის სააგენტო სთხოვს პირებს, რომლებსაც დაავადებულ ცხოველთან შეხება ჰქონდა, რომ გამოეხმაურონ და დაუყოვნებლივ ვაქცინაცია გაიკეთონ.