პარტია გახარია საქართველოსთვის ლიდერი თეონა აქუბარდია რუსეთის, აფხაზეთისა და ცხინვალის მარიონეტული რეჟიმების მიერ ჟენევის დისკუსიების მინსკში გადატანის მოთხოვნას საქართველოს სუვერენიტეტის მიმართ დამატებით საფრთხეს უწოდებს. ამის შესახებ მან ბრიფინგზე განაცხადა. თეონა აქუბარდიას განმარტებით, გუშინ, ჟენევის საერთაშორისო დისკუსიების 62-ე რაუნდზე, არჩევნებიდან ერთ კვირაში, კიდევ უფრო მკაფიოდ გამოჩნდა, თუ რა დიდი საფრთხე შეუქმნა ბიძინა ივანიშვილმა საქართველოს ნამდვილ სუვერენიტეტს და ტერიტორიულ მთლიანობას.

"რუსეთის საგარეო უწყების განცხადებაში ღიად არის გამოყენებული ივანიშვილის მიერ საკუთარ სამშობლოზე ომის გადაბრალების და მეორე ფრონტის გახსნის პროპაგანდა, როგორც შესაძლებლობა დამატებითი ზეწოლის მოსახდენად ჩვენს მიერ ოკუპირებული რეგიონების ე.წ. დამოუკიდებლობის აღიარებისთვის. ამასთან, პირველად ჟენევის ფორმატში რუსეთმა ღიად დააფიქსირა უკმაყოფილება საქართველოს ევროატლანტიკური კურსის კონსტიტუციური ჩანაწერის შესახებ", — აცხადებს თეონა აქუბარდია.

თეონა აქუბარდიას მოჰყავს ციტატა განცხადებიდან, სადაც წერია, რომ ოფიციალური თბილისის აღიარებით, თავად საქართველოში და მის მიღმა არსებობენ პოლიტიკური ძალები, რომლებიც ამუშავებენ გეგმებს რუსეთის წინააღმდეგ ოკუპირებულ აფხაზეთსა და ცხინვალის რეგიონში "მეორე ფრონტის" გახსნის შესახებ.

აქუბარდიას განცხადებით, რუსეთმა არჩევნებიდან მალევე გამოავლინა უკმაყოფილება
ქართული ოცნების მიერ საკონსტიტუციო უმრავლესობის ვერ მიღებასთან დაკავშირებით.

"მიუხედავად ფაქტობრივად საქართველოს ნატოსა და ევროკავშირში გაწევრიანების შეწყვეტილი შესაძლებლობისა, რუსეთის და ოკუპირებული აფხაზეთის და ცხინვალის რეგიონების მარიონეტული რეჟიმების მხრიდან ჟენევის დისკუსიების მინსკში გადატანის საკითხზე პედალირება კიდევ ერთხელ უსვამს ხაზს რუსეთის ამოცანას — დატოვოს საქართველო დასავლეთის მხარდაჭერის გარეშე და კიდევ მეტად მიიტაცოს ჩვენი სუვერენიტეტი.

მოვუწოდებ ივანიშვილის ოცნებას, გამოვიდეს და უთხრას ხალხს სიმართლე,
ტერიტორიული მთლიანობის აღდგენის ილუზიების შექმნის ნაცვლად და ახსნას, რას
უპირისპირებს რუსეთის ამ პოლიტიკას საქართველოს უსაფრთხოების და
სუვერენიტეტის შესანარჩუნებლად მაშინ, როცა საქართველოს დასავლეთისგან
იზოლაციის პოლიტიკის შემოქმედი თავად ის არის!", — აცხადებს თეონა აქუბარდია