პარლამენტის თავმჯდომარე შალვა პაპუაშვილი ამბობს, რომ ის დარწმუნებულია იმაში, რომ ოპოზიციონერები "ადრე თუ გვიან" პარლამენტში შევლენ.

მათ რასაც ეტყვიან ისე მოიქცევიან ეტყვიან, იქნებ შემოვიდნენ პარლამენტში, რომ შიგნით ჰყავდეთ ბუნტისთავები და ისტერიის მომწყობები — ასეთ განცხადებას აკეთებს პარლამენტის თავმჯდომარე ოპოზიციის გადაწყვეტილებაზე პარლამენტში შესვლაზე უარის თქმასთან დაკავშირებით.

ამასთან, პაპუაშვილმა დასძინა, რომ ოპოზიციას მე-10 მოწვევის პარლამენტში შფოთვის და ისტერიის გარდა არაფერი მოუწყვიათ და არანაირი მნიშვნელობა არ აქვს იქნებიან თუ არა ისინი საკანონმდებლო ორგანოში.

"არანაირი მნიშვნელობა არ აქვს ოპოზიცია იქნება თუ არა პარლამენტში. ეს გვასწავლა ჩვენ მათ, შორის მე-10 მოწევის პარლამენტმა, რომელშიც ისინი გვიან შემოვიდნენ, მაგრამ მათ შემოსვლა-არშემოსვლას პარლამენტისთვის არანაირი მნიშვნელობა არ ჰქონია. გარდა შფოთვისა და ისტერიისა პარლამენტში არაფერი მოუწყვიათ, ამიტომ ჩვენი ქვეყნისთვის, პარლამენტისთვის და პარლამენტის ფუნქციონირებისთვის ამას არანაირი მნიშვნელობა არ აქვს. მეორე მხრივ, მე დარწმუნებული ვარ, ადრე თუ გვიან, რა თქმა უნდა, შემოვლენ. ამ მოწვევის პარლამენტითაც ეგ გვასწავლეს. შემოვიდნენ კი არა, 2021 წლის დეკემბერში გვეხვეწებოდნენ, რომ ის დაკარგული ხელფასები, რაც ჰქონდათ არშემოსვლის გამო, აღგვედგინა. დეკემბრის ბოლო რიცხვებში სპეციალურად შეიკრიბა ჯერ ხაზინართა საბჭო, შემდეგ სპეციალურად შევიკრიბეთ ბიურო, რომ ეს მათი მსუყე თანხები რაღაცნაირად მიეღოთ და ჩარიცხოდათ თავის ანგარიშებზე. ასე რომ ეს ხალხი, რა თქმა უნდა, შემოვა, იმიტომ, რომ მათ არანაირი ღირებულებები არ გააჩნიათ. მეორე - მათ რასაც ეტყვიან ისე მოიქცევიან. დარწმუნებული ვარ, საბოლოო ჯამში, ასე ეტყვიან, რომ იქნება შემოვიდნენ პარლამენტში, რომ შიგნით ჰყავდეთ ბუნტისთავები და ისტერიის მომწყობები", — განაცხადა პაპუაშვილმა.