აშშ-ის პრეზიდენტმა, ჯო ბაიდენმა დონალდ ტრამპს საპრეზიდენტო არჩევნებში გამარჯვება მიულოცა და თეთრ სახლში მიიწვია. ამის შესახებ ინფორმაციას CNN თეთრი სახლის მაღალჩინოსანზე დაყრდნობით ავრცელებს. წყაროს ინფორმაციით, პრეზიდენტი ჯო ბაიდენი ხუთშაბათს, 7 ნოემბერს, სიტყვით გამოსვლას გეგმავს.

"პრეზიდენტმა ბაიდენმა გამოხატა თავისი მზადყოფნა უზრუნველყოს [ძალაუფლების] მშვიდად გადაცემა და ხაზი გაუსვა ქვეყნის გასაერთიანებლად მუშაობის მნიშვნელობას. მან, ასევე, მიიწვია პრეზიდენტად არჩეული ტრამპი თეთრ სახლში მასთან შესახვედრად. შეხვედრის ზუსტ თარიღზე ინფორმაცია მოგვიანებით გახდება ცნობილი", — აღნიშნა წყარომ.

თეთრის სახლის მაღალჩინოსანმა ასევე განაცხადა, რომ პრეზიდენტი ბაიდენი ვიცე-პრეზიდენტ კამალა ჰარისს ესაუბრა და მას "ისტორიული კამპანია მიულოცა".

5 ნოემბერს აშშ-ში ჩატარებულ არჩევნებში აშშ-ს ყოფილმა პრეზიდენტმა, რესპუბლიკელმა დონალდ ტრამპმა გაიმარჯვა და ის აშშ-ის 47-ე პრეზიდენტი გახდა. საარჩევნო მარათონში ტრამპმა დემოკრატების კანდიდატი, ვიცე-პრეზიდენტი კამალა ჰარისი დაამარცხა. CNN-ის მონაცემებით, ამერიკის ყოფილმა პრეზიდენტმა საარჩევნო კოლეგიის 295 ხმა მიიღო, მისმა კონკურენტმა, კამალა ჰარისმა — 226 საარჩევნო ხმა.