დღეს, 18 აგვისტოს, თბილისში საკონსტიტუციო რეფორმასთან დაკავშირებით, მმართველი გუნდი 20-მდე ოპოზიციურ პარტიას შეხვდა. არჩილ თალაკვაძემ ოპოზიციას რეფორმაზე მსჯელობის განახლება რამდენიმე დღის წინ შესთავაზა.

მმართველი პარტიის თქმით, მას აინტერესებდა ოპოზიციის აზრი საარჩევნო სისტემაზე. ხელისუფლება ოპოზიციურ პარტიებს რამდენიმე დღეში მათ მოთხოვნებზე პასუხის გაცემას ჰპირდება.

რესპუბლიკელების წევრი თამარ კორძაია აცხადებს, რომ ეს იყო "შეხვედრა შეხვედრისთვის" და კონკრეტული პასუხი საარჩევნო სისტემას შეცვლის მზადყოფნაზე მათ არ მიუღიათ.

ახალი საქართველოს ლიდერი გიორგი ვაშაძე კი ამბობს, რომ თუ ქართულ ოცნებას ოპოზიციასთან დიალოგის გაგრძელება სურს, მაშინ მმართველმა პარტიამ უნდა გადაწყვიტოს, რომ 2020 წლისთვის ქვეყანა პროპორციულ საარჩევნო სისტემაზე გადავა.

ქართული ოცნება აღნიშნულ საკითხზე საბოლოო გადაწყვეტილებას ოპოზიციას 6 სექტემბერს გააცნობს.