დღეს, 18 აგვისტოს, თბილისში საკონსტიტუციო რეფორმასთან დაკავშირებით, მმართველი გუნდი 20-მდე ოპოზიციურ პარტიას ხვდება. რამდენიმე დღის წინ, ქართული ოცნების ერთ-ერთმა ლიდერმა, არჩილ თალაკვაძემ ოპოზიციას რეფორმაზე მსჯელობის განახლება შესთავაზა.

შეხვედრა დახურულ კარს მიღმა მიმდინარეობს. ოპოზიციის ძირითადი ნაწილი, ასევე, არასამათავრობო ორგანიზაციები თანხმდებიან ერთ საკითხზე, რომ 2020 წლის საპარლამენტო არჩევნები უნდა ჩატარდეს სრულად პროპორციული სისტემით და არა შერეულით, რომელსაც ქართული ოცნება ემხრობა. სხდომის დაწყებამდე მედიასთან თავიანთ მოლოდინებზე ისაუბრეს სხვადასხვა პარტიის წარმომადგენლებმა. აი რას ამბობს მათი ნაწილი:

თავისუფალი დემოკრატების ლიდერი, შალვა შავგულიძე ამბობს, რომ შედგება, თუ არა რეალური კონსენსუსი დამოკიდებლია ისევ მმართველ პარტიაზე. შავგულიძის თქმით, ის მოლაპარაკების მაგიდასთან მხოლოდ იმ შემთხვევაში დაჯდება, თუ მსჯელობა დაიწყება სრულად პროპორციულ საარჩევნო სისტემაზე.

"სრულად პროპორციულ საარჩევნო სისტემაზე თუ არის მსჯელობა ასეთ შემთხვევაში ჩვენ ვსხდებით მაგიდასთან და ამ სისტემის ცალკეულ კომპონენტებზე მზად ვართ მოლაპარაკებებისთვის. თუ ხელისუფლებას სურს, რომ იმსჯელოს მხოლოდ მისი ერთპიროვნული გადაწყვეტილების ირგვლივ, რომ საარჩევნო სისტემა უნდა შენარჩუნდეს მაჟორიტარუl-პროპორციული, ეს არის მხოლოდ მისი იდეა, ეს არის მისი კონსტიტუცია, და შესაბამისად, აქ მოლაპარაკებების მაგიდასთან ჩვენ არ დავსხდებით."

ევროპული საქართველოს წარმომადგენელის, ლევან თარხნიშვილის თქმით, მათი პრინციპული პოზიციაა, რომ პროპორციულ სისტემაზე ქვეყანა უნდა გადავიდეს 2020 წელს, თუმცა პარტიაში ხელისუფლების მიერ დათმობაზე წასვლის წინაპირობას ვერ ხედავენ.

"მეორე საკითხი ეს არის პრეზიდენტის არჩევის წესი. აქ ჩვენ გარკვეულ კომპრომისს ვთავაზობთ, მოდი ხალხს დავეკითხოთ და ხალხმა თავად გადაწყვიტოს, უნდა რომ აირჩიოს პრეზიდენტი პირდაპირ, თუ აირჩიოს რაღაც გაურკვეველმა ხმოსნებმა."

პატრიოტთა ალიანსის ლიდერი და დეპუტატი ირმა ინაშვილი კონსენსურის არარსებობის პირობებში აქციებს აანონსებს:

"ამ აქციების მზიანი დღევანდელი მდგომარეობით არის საარჩევნო სისტემის შეცვლა. თუ კონსენსუსი არ შედგა, ჩვენ საპროტესტო აქციებზე განვაგრძობთ ხელისუფლებისთვის ამ მოწოდების შეთავაზებას, რომ სისტემა შეიცვალოს."

დემოკრატიული მოძრაობის წევრს, გიორგი ახვლედიანს არ აქვს მოლოდინი, რომ ხელისუფლება ულტიმატუმების გარეშე ისაუბრებს და პროპორციულ სისტემაზე გადასვლას დათანხმდება:

"ხელისუფლებას სჭირდება კონსენსუსი. ის რეალურ კონსენსუს მიიღებს იმ შემთხვევაში, თუ ქვეყანა გადავა სამართლიან პროპორციულ სისტემაზე მომავალი არჩევნებიდან და ეს საარჩევნო სისტემა იქნება სამართლიანი. სამართლიანი მანდატების გადანაწილების პრინციპით, ბლოკების დატოვებით და სამართლიანი ბარიერით. ამ შემთხვევაში ჩვენ ნამდვილად განწყობილი ვართ, რომ შევთანხმდეთ."

ნაციონალური მოძრაობის წევრი, ნიკა რურუა ფიქრობს, რომ ხელისუფლებასთან დიალოგს აზრი ექნება იმ შემთხვევაში, თუ საკონსტიტუციო პროექტის ის მოცემულობა დაბრუნება, რომელმაც გაიარა საერთო სახალხო განხილვები და რომელიც წარდგენილი იყო ვენეციის კომისიისადმი. ამ მხრივ, რურუა მათთვის ორ საკვანძო საკითხს ასახელებს:

"2020 წელს ქვეყანა გადავა მთლიანად პროპორციულ სისტემაზე და ასევე, დავამატეთ ძალიან მნიშვნელოვანი საკითხი, რომელზეც ვაჭრობას არ ვაპირებთ, რომ პრეზიდენტის პირდაპირი არჩევის შესახებ ვკითხოთ ხალხს. აი ეს ორი საკითხია".

საპარლამენტო უმრავლესობის ლიდერმა, არჩილ თალაკვაძე, საკონსტიტუციო რეფორმაზე ოპოზიციასთან შეხვედრამდე კონკრეტული განსახლევი საკითხების დასახელებისგან თავი შეიკავა. მისი თქმით, მათი მთავარი პირობა არის, რომ ხელისუფლება მზადაა დიალოგისთვის ოპოზიციურ პარტიებთან.