შარლოტსვილში ნეო-ნაცისტებისა აქციაზე დაღუპული ჰეზერ ჰეიერის დედა აცხადებს, რომ ამერიკის პრეზიდენტთან ლაპარაკის სურვილი არ აქვს. ინფორმაციას ABC ავრცელებს.

32 წლის ჰეზერ ჰეიერი შარლოტსვილიდან იყო. ის 12 აგვისტოს თეთრი ნაციონალისტების მსვლელობას აპროტესტებდა, როდესაც ულტრა-მემარჯვენეების წარმომადგენელი ხალხში მანქანით შევარდა და ჰეიერი იმსხვერპლა.

"მესმის, რომ პრეზიდენტ ტრამპს ჩემთან საუბარი სურს, ამაზე მისი პრესმდივნისგან გავიგე. არ მინდა ჯიუტი ვჩანდე, უბრალოდ არანაირი სურვილი მაქვს მოვუსმინო პოლიტიკოსების "ვწუხვარს". თუ ვიგრძენი, რომ მათ მართლა მხოლოდ სამძიმრის გამოთქმა სურთ, ეს სხვა საქმეა და ამას გავიგებ, თუმცა, მგონია, რომ მათ ჩემი სახელის გამოყენება პოლიტიკური პიარისთვის სჭირდებათ, რისიც სასტიკად წინააღმდეგი ვარ" - უთხრა სიუზან ბრომ ABC-ის.

რამდენიმე დღის წინ, სიუზან ბრომ ტრამპს მადლობა გადაუხადა მათი გაკიცხვისთვის, ვინც სიძულვილსა და ძალადობას ავრცელებდა, თუმცა დღევანდელ ინტერვიუში ამბობს, რომ მას შემდეგ, რაც ახალ ამბებს უსმინა, ამერიკის პრეზიდენტზე წარმოდგენა შეეცვალა.

"ახალ ამბებს გუშინდლამდე არ გავცნობივარ და რაც პრეზიდენტმა ტრამპმა თქვა, ამის შემდეგ, მე მასთან ლაპარაკი აღარ მსურს. მან თეთრი რასის უპირატესობის მომხრეები და ისინი, ვინც მათ ძალადობას აპროტესტებდნენ, ერთმანეთს გაუთანაბრა. ტრამპი ამას "ვწუხვარის" თქმით ვერ ჩამოირეცხავს, მე მას არ ვაპატიებ" - ამბობს აქციაზე მოკლული ქალის დედა.

შეგახსენებთ, რომ ტრამპმა არეულობის გამო ულტრა-ნაციონალისტების გარდა, მათი მოწინააღმდეგეებიც, გააკრიტიკა.

"დაფიქრდი, სანამ ლაპარაკს დაიწყებ" - ეს უპასუხა სუზან ბრომ ჟურნალისტის კითხვას, რამეს თუ გადასცემდა აშშ-ს პრეზიდენტს.