ოპოზიციის ორგანიზებით, 4 ნოემბერს, 19:00 საათზე, თბილისში, რუსთაველის გამზირზე აქცია გაიმართება, სადაც საპარლამენტო არჩევნების შედეგებს გააპროტესტებენ.

აქცია ოპოზიციამ რამდენიმე დღის წინ დააანონსა. როგორც კოალიცია ძლიერი საქართველოს ლიდერმა, ანა დოლიძემ განაცხადა, დღევანდელ აქციაზე გახდება ცნობილი ოპოზიციის სამოქმედო გეგმა.

"ჩვენი მთავარი ამოცანა არის ბრძოლა ამ არჩევნების არალეგიტიმურად აღიარებისთვის, ვაგრძელებთ მუშაობას ჩვენს პარტნიორებთან, როგორც ამას ვაკეთებდით და რაც მთავარია, ჩვენ შევიკრიბებით ორშაბათს, 19:00 საათზე რუსთაველზე და იქ მოგახსენებთ სამოქმედო გეგმას დეტალურად, თუ როგორ, შინ თუ გარეთ, კანონის მიხედვით, სამართლიანად, მაგრამ ორგანიზებულად და შედეგიანად გაგრძელდება ჩვენი პროტესტი", — აღნიშნა ანა დოლიძემ.

1-ელ ნოემბერს კოალიცია ცვლილებისთვის ერთ-ერთმა ლიდერმა, ნიკა გვარამიამ სოციალურ ქსელში გამომწერებს მიმართა, ვისაც საშუალო და დიდი კარვები ჰქონდა, მას შეხმიანებოდა.

"ვისაც საშუალო და დიდი კარვები გაქვთ, შეგვეხმიანეთ. თუ გვაჩუქებთ — გაგვიხარდება, თუ მოგვყიდით — მაინც გაგვიხარდება.

p.s. არაფრის დამალვას არ ვაპირებ. ღიად ვიზამ ამიერიდან ყველაფერს. სუსიც ფეხებზე მკიდია, პროკურატურაც, პოლიციაც და რაჟდენიც", — დაწერა გვარამია.

ამავე დღეს კიდევე ერთი ოპოზიციური პარტია გახარია საქართველოსთვის ლიდერმა, ნათია მეზვრიშვილმა განაცხადა, რომ არ ჰგონია, მათი მხარდამჭერები კარვებში შევიდნენ.

"მაგრამ თუ ჩვენი ამომრჩეველი გადაწყვეტს, რომ ჩვენ აქციებში უნდა ვიყოთ, ჩვენ, ბუნებრივია, შევასრულებთ ჩვენი ამომრჩევლების დაკვეთას და ასე იყო წინა აქციაზეც — ჩვენ მივედით", — განაცხადა ნათია მეზვრიშვილმა.