GEM Fest-ის ორგანიზატორს, გიორგი სიგუას ამ წუთებში ფინანსთა სამინისტროს საგამოძიებო სამსახურის თანამშრომლები ჰკითხავენ. დაკითხვაზე შესვლამდე სიგუამ ჟურნალისტებთან განაცხადა, რომ საქმე აღძრულია არა მის, ან ფესტივალის წინააღმდეგ, არამედ ზოგადად ფესტივალის ფარგლებში ქონების დაზიანებაზე:

"ცოტა გაუგებარია და ამიტომ ჩამოვედი საქართველოში, რომ გავარკვიო, რატომ ამოიღეს სრული დოკუმენტაცია ჩვენი ოფისიდან, რატომ წაიღეს კომპიუტერები, რას ეძებენ, რისი პოვნა უნდათ."

გიორგი სიგუას მტკიცებით, მას წარმოდგენა არ აქვს რა ფინანსურ დარღვევებზე შეიძლება იყოს საუბარი. მისივე თქმით, სახელმწიფო ბიუჯეტი, რომელიც GEM Fest-ს მოხმარდა, პირდაპირ არტისტების ჰონორარებში დაიხარჯა და მის კომპანიას არც ერთი თეთრი არ აუღია.

GEM Fest-ის შესაძლო ფინანსურ დარღვევასთან დაკავშირებით გამოძიება გუშინ, 17 აგვისტოს დაიწყო, თუმცა საქმეს კონკრეტული კვალიფიკაცია ჯერ არ აქვს მინიჭებული. გამოძიების ცნობით, პირველ ეტაპზე დოკუმენტების ამოღება და ინფორმაციის გამოთხოვა მიმდინარეობს, ასევე დაიკითხებიან მოწმეებიც.

14 აგვისტოს დასრულდა GEM Fest-ის ერთთვიანი მუსიკალური ფესტივალი. ორგანიზატორის, გიორგი სიგუას თქმით, ფესტივალი ფინანსურად შემოსავლიანი არ გამოდგა, რაც მისი მცდარი წარმოდგენების შედეგია. სახელმწიფო ბიუჯეტიდან GEM Fest თითქმის ორი მილიონი ლარით დაფინანსდა.