თუკი სელინ დიონის ოლიმპიადის გახსნაზე შესრულებული პერფორმანსის მერე რაიმე აგვიჩუყებდა გულს, ეს მხოლოდ მისი და ადელის ემოციური შეხვედრის ვიდეო თუ იქნებოდა.

26 ოქტომბერს, ლას-ვეგასის კოლოსეუმის თეატრში გამართულ კონცერტზე, ადელმა აუდიტორიაში ნაცნობ სახეს მოჰკრა თვალი. დარბაზში, არც მეტი, არც ნაკლები, სელინ დიონი იჯდა, რომელიც ადელის ჰიტებსაც კი ჰყვებოდა. აცრემლებულმა პოპვარსკვლავმა სიმღერა შეწყვიტა და თავის კერპს მიუახლოვდა, მერე კი მუსიკის ორი ლეგენდა ერთმანეთს ჩაეხუტა. ადელისა და სელინ დიონის ამ გულის ამაჩუყებელი შეხვედრის ვიდეო სულ მალე ინტერნეტსივრცეს მოედო.

მოგვიანებით, შეხვედრას თავად ადელიც გამოეხმაურა კიდევ უფრო ემოციური განცხადებით.

"კოლოსეუმში, სელინ დიონის დარბაზში, თითქმის ორი წელია, კონცერტებს ვმართავ", — წერს პოპვარსკვლავი, — "ლას-ვეგასის ერთადერთი დარბაზი იყო, სადაც კონცერტის ჩატარება მსურდა, რადგან ეს მისთვის აშენდა. აქვეა ჩამოკიდებული მისი სურათი, რომელსაც ყოველ საღამოს, სცენაზე გასვლამდე ვეხები ხოლმე. ახლა კი მისი მოსვლა კონცერტზე ნამდვილი სიურპრიზი და დიდებული მომენტი იყო".

დარბაზი, რომელშიც ადელმა იმღერა, მართლაც სელინ დიონის კონცერტების სერიისთვის აიგო 2003 წელს, მას შემდეგ კი სხვა ვარსკვლავებსაც უმასპინძლა, მათ შორის, ელტონ ჯონს, კაილი მინოუგსა და დაიანა როსს.

"სელინ, ძალიან, ძალიან, მიყვარხარ", — წერს ადელი თავის პოსტში, — "სიტყვებით ვერასდროს გადმოვცემ, რამდენად მნიშვნელოვანი ხარ ჩემთვის, რამდენად მნიშვნელოვანი იყო შენი მოსვლა ჩემს კონცერტზე, რომ აღარაფერი ვთქვათ შენს სასახლეში ოჯახთან ერთად დაბრუნებაზე. დიდი მადლობა".

სელინ დიონის გამოჩენამ მარტო ადელის კონცერტზე კი არა, მსოფლიოშიც ფურორი მოახდინა, როცა ლეგენდარულმა კანადელმა მუსიკოსმა პარიზის 2024 წლის ოლიმპიური თამაშების გახსნის ცერემონია დახურა. საფრანგეთის წვიმიან დედაქალაქში, ეიფელის კოშკზე, დიონმა როიალის თანხლებით შეასრულა ედიფ პიაფის Hymne A L'Amour და მილიონობით მაყურებელი აატირა. ეს იყო სელინის დაბრუნება სცენაზე 4-წლიანი პაუზის შემდეგ.

• ლეგენდა სცენას დაუბრუნდა — ნახეთ სელინ დიონის გამოსვლა ოლიმპიადის გახსნაზე

კონცერტების არაერთხელ გადადების შემდეგ, სელინ დიონმა 2022 წლის მიწურულს განაცხადა, რომ გაშეშებული ადამიანის სინდრომი (Stiff Person Syndrome) დაუდგინდა. ეს იშვიათი ნევროლოგიური დაავადება, რომელიც მილიონში ერთ ადამიანს ემართება, თანდათან პროგრესირებს და იწვევს ტკივილს, კრუნჩხვებს და კუნთოვან გაშეშებას. ამ დაავადებასთან ერთად ცხოვრების რთული მომენტები ვიხილეთ სელინზე გადაღებულ ბიოგრაფიულ ფილმში I Am: Celine Dion, რომელიც ივნისში გამოვიდა.

• გაშეშებული ადამიანის სინდრომით ცხოვრება ურთულესი გამოცდილებაა — სელინ დიონი

ჯანმრთელობის მდგომარეობის გაუარესების მიუხედავად, სელინმა პირობა დადო, რომ მონატრებულ მსმენელს დაუბრუნდებოდა. ხოხვაც რომ მომიწიოს, სცენაზე აუცილებლად დავბრუნდებიო, განაცხადა მან და აასრულა კიდეც ეს დაპირება.