ბაღდათის 52-ე ოლქის 23-ე საარჩევნო უბანზე ინციდენტი მოხდა. ახალგაზრდა მამაკაცმა უბანზე შესვლის დროს დააზიანა სარჩევნო ინვენტარი. მათ შორის, ვერიფიკაციის სამი აპარატიდან მწყობრიდან გამოვიდა ორი და ამჟამად მხოლოდ ერთი რეგისტრატურის საშუალებით მიმდინარეობს მუშაობა.

დაზიანდა ხმის მთვლელი ორივე აპარატი, თუმცა მას შემდეგ, რაც ადგილზე მივიდნენ საოლქოს წარმომადგენლები, მისი აღდგენა შეძლეს და კენჭისყრის პროცესი სწორედ მათი მეთვალყურეობით მიმდინარეობს.

მომხდარს ცესკო-ს თავმჯდომარე, გიორგი კალანდარიშვილი გამოეხმაურა. მისი თქმით, საარჩევნო კომისიამ უზრუნველყო, რომ კენჭისყრა სხვა აპარატების გამოყენებით შეუფერხებლად გაგრძელდა.

"მინდა გამოვეხმაურო ბაღდათის 23-ე საარჩევნო უბანზე მომხდარ შემთხვევას, რომლის ფარგლებშიც, ამომრჩეველმა, რომელიც გარკვეული ფსიქოემოციურ მდგომარეობაში იმყოფებოდა, საარჩევნო უბანზე ვერიფიკაციის რამდენიმე აპარატის იმდაგვარად დაზიანება მოახდინა, რომ შეუძლებელი იყო ამ აპარატების მეშვეობით პროცესის გაგრძელება. კომისიამ შესაბამისი რისკების მართვის გათვალისწინებით უზრუნველყო, რომ სხვა აპარატების გამოყენებით შეუფერხებლად გაგრძელდა კენჭისყრის მიმდინარეობა საარჩევნო უბანზე", – განაცხადა გიორგი კალანდარიშვილმა.