"ცალსახად უნდა ითქვას რომ ვგმობთ ყოველგვარ ძალადობას და ძალოვან უწყებებს მოვუწოდებთ ფაქტის სასწრაფოდ და ობიექტურად გამოძიებისკენ", — განცხადებას კოალიცია ძლიერი საქართველო ავრცელებს და პროსამთავრობო მედიაში გავრცელებულ ინფორმაციას ეხმაურება იმასთან დაკავშირებით, რომ ტრანსგენდერ ქალ, ნატა ტალიკაშვილზე თავდასხმისთვის დაკავებული პარტია ლელოს წევრია.

NEWS.On.ge-ს ინფორმაციით, აღნიშნული პირი არა პარტია ლელოს, არამედ კოალიცია ძლიერი საქართველოს შემადგენლობაში შემავალი პარტიის — ხალხისთვის წევრია.

"გავრცელებულ ინფორმაციასთან დაკავშირებით დეტალები ჩვენთვის ამ დრომდე უცნობია. როგორც სამართალდამცავი ორგანოებისგან ვიცით, ფაქტთან დაკავშირებით მიმდინარეობს გამოძიება. ისინი ახორციელებენ შესაბამის ღონისძიებებს და ჩვენც მათგან ველოდებით ინფორმაციას.

ცალსახად უნდა ითქვას რომ ვგმობთ ყოველგვარ ძალადობას და ძალოვან უწყებებს მოვუწოდებთ ფაქტის სასწრაფოდ და ობიექტურად გამოძიებისკენ, ჩვენც საზოგადოებასთან ერთად ველოდებით შესაბამის საგამოძიებო დასკვნას. ჩვენ მზად ვართ მივიღოთ ყველა საჭირო პოლიტიკური ზომები, მას შემდეგ რაც ობიექტური გამოძიების შედეგები იარსებებს", — ნათქვამია კოალიცია ძლიერი საქართველოს მიერ გავრცელებულ ინფორმაციაში.

NEWS.On.ge ინფორმაციის შსს-ში გადამოწმებას შეეცადა. პრესსამსახურში გვითხრეს, რომ კონკრეტულად ვინ დაესხა თავს ნატა ტალიკიშვილს, ვერ დააკონკრეტებენ, თუმცა დააზუსტეს, რომ პირი, რომელიც ტრანსგენდერ ქალს დაესხა თავს, ცხელ კვალზე დააკავეს.

შსს-ს ინფორმაციით, ფაქტზე გამოძიება სისხლის სამართლის კოდექსის 126-ე მუხლის პირველი ნაწილით მიმდინარეობს, რაც ძალადობას გულისხმობს.