ერთიანი ნაციონალური მოძრაობის თბილისის მერობის კანდიდატის ზაალ უდუმაშვილის ინიციატივით სოციალურად დაუცველი ყველა თბილისელი, ვისი სარეიტინგო ქულაც 200 000-მდეა, ყოველთვიურად 50-ლარიან დახმარებას მიიღებს.

უდუმაშვილი ამომრჩეველს ჰპირდება, რომ გაიზრდება ბავშვთა, მოზარდთა და შეზღუდული შესაძლებლობის მქონე პირების ჯანდაცვის პროგრამების დაფინანსება. ასევე, სამჯერ გაიზრდება უფასო სასადილოების დაფინანსება.

მერობის კანდიდატის ინიციატივით, წელიწადში 40 000 ლარზე ნაკლები შემოსავლის მქონე ოჯახის ახალშობილი ათასი ლარით დასაჩუქრდება.

სოციალურად დაუცველი თბილისელებისთვის დახმარების გაზრდაზე, ასევე, ევროპული საქართველოს მერობის კანდიდატმა ელენე ხოშტარიამ ისაუბრა:

"შევამცირებთ ბიუროკრატიულ ხარჯებს და მერიის ბიუჯეტიდან მოქალაქეებს პენსიაზე 50 ლარის, ხოლო სოციალურად გაჭირვებულებს 145 ლარიდან 520 ლარამდე დანამატს გავუკეთებთ".