ქართული რუსულენოვანი გამოცემა Sova იტყობინება, რომ მას საკუთარ ვებსაიტზე წვდომა დაებლოკა.

ქართული რუსულენოვანი გამოცემა Sova-ს ძველი დომენი, sova.news, "უცნობმა პირმა" მიიტაცა და ახლა რუსულ პროპაგანდისტულ ნარატივს ავრცელებს. Sova-ს თქმით, sova.news-ზე განთავსებული საიტი რუსული პროპაგანდისტული მანქანის გავლენის ქვეშ აღმოჩნდა და ამჟამად არანაირი კავშირი არ აქვს მათ საქმიანობასთან.

დაბნეულობის თავიდან ასაცილებლად, Sova-მ განაცხადა, ახლა მათი ოფიციალური გვერდი sovanews.tv-ია და არ აქვს სხვა მისამართი ინტერნეტში.

"ინტერნეტში გამოჩნდა რესურსი, რომელიც შენიღბულია ჩვენი სახელით. ის ჩვენს ძველ დომენ — sova.news-ზეა, რომელიც რეგისტრატორის საეჭვო ქმედებების გამო გაუქმდა. ამჟამად ვამზადებთ სამართლებრივი ბაზას რეგისტრატორის ქმედებების კომპეტენციაზე. საიტი გადავიდა ახალ მისამართ sovanews.tv-ზე და დღეს ეს გამოცემის ერთადერთი მისამართია.

აღმოჩნდა, რომ Sova-ს კუთვნილი დომენი უცნობმა პირმა იყიდა და ამ მისამართზე ქსელში ჩვენი რესურსის ყალბი ვარიანტი გამოჩნდა ნაწილობრივ მოპარული შინაარსით. თუ ვიმსჯელებთ საიტის ახალი კონტენტით, სადაც ჩვენი იურიდიული პირის სახელწოდება Sova.News-ია გამოყენებული, რესურსის მანიპულაციების უკან რუსული პროპაგანდა დგას, რომელიც ჩვენი აუდიტორიის შეცდომაში შეყვანას ცდილობს", — ნათქვამია Sova-ს მიერ გავრცელებულ წერილში.