თბილისის წყლით მომმარაგებელი კომპანიის, ჯორჯიან უოთერ ენდ ფაუერს (GWP), ნიდერლანდების განვითარების ბანკსა (FMO) და გერმანიის საინვესტიციო და განვითარების საზოგადოებას (DEG) შორის ხელშკრულება გაფორმდა, რომლის თანახმად ჯორჯიან უოთერ ენდ ფაუერი FMO-სგან 40 მილიონი დოლარის მოცულობის ექვივალენტს ეროვნულ ვალუტაში, ხოლო DEG-სგან 25 მილიონი ევროს მოცულობის გრძელვადიან სესხს მიიღებს.

დღევანდელი კურსით, ამ თანხის ოდენობა 166 527 000 ლარს შეადგენს.

ფინანსთა სამინისტროს ინფორმაციით, აღნიშნული ფინანსური რესურსით GWP გარდაბნის გამწმენდი ნაგებობის მოდერნიზაციას, წყალმომარაგების ქსელის რეაბილიტაციასა და ბოდორნაჰესის მშენებლობას დააფინანსებს.

პირველი ვიცე-პრემიერი, ფინანსთა მინისტრი დიმიტრი ქუმსიშვილი, საერთაშორისო საფინანსო ინსტიტუტებისგან გრძელვადიან დაფინანსების ხელშეკრულების ხელმოწეროს ცერემონიას დაესწრო.