"ქართული ოცნების საარჩევნო ბანერებზე მიმდინარეობს შესწავლა", — ამის შესახებ ცესკოს თავმჯდომარემ, გიორგი კალანდარიშვილმა რადიო თავისუფლებასთან განაცხადა.

ჟურნალისტის კითხვაზე — ქართული ოცნების წინასაარჩევნო ბანერებსა და რეკლამებზე უკრაინის ომის სურათების გამოხატვა არის თუ არა აგიტაციის წესის დარღვევა, ცესკოს თავმჯდომარე, გიორგი კალანდარიშვილი პასუხობს, რომ ცესკო ამ საკითხს სწავლობს.

"ეს მიმდინარედ შესწავლის საკითხია და შესაბამის ვადებში, როდესაც დასრულდება მოკვლევა, გვექნება პოზიცია", — აცხადებს გიორგი კალანდარიშვილი.

მისივე თქმით, ამ საკითხზე გადაწყვეტილებას 10 დღის ვადაში უნდა ველოდოთ.

შეგახსენებთ, რომ ქართული ოცნების სარეკლამო ბანერები, სადაც უკრაინის ომის ამსახველი კადრებია გამოსახული, საპარლამენტო არჩევნებამდე ზუსტად ერთი თვით ადრე, 26 სექტემბერს გამოჩნდა.

ბილბორდების გამოჩენიდან მალევე განცხადება გაავრცელა უკრაინის საგარეო საქმეთა სამინისტრომ.

ევროკავშირის ელჩმა ოცნების პროპაგანდისტულ ბანერებს "აღმაშფოთებელი, სამარცხვინო და შემზარავი" უწოდა. საქართველოს პრეზიდენტმა, სალომე ზურაბიშვილმა ოცნების ბილბორდებს "კგბ-ს სამჭედლოში დამზადებული პლაკატები" უწოდა. სამმა დამოუკიდებელმა ტელევიზიამ კი ამ რეკლამების ეთერში გაშვებაზე უარი თქვა.

თუ გაინტერესებს 2024 წლის საპარლამენტო არჩევნებთან დაკავშირებული მნიშვნელოვანი სიახლეები გაწევრიანდით ჯგუფში — საპარლამენტო არჩევნები 2024.