დღეს, თბილისის საქალაქო სასამართლომ ტელეკომპანია "ფორმულა" 5000 ლარით დააჯარიმა და სარეკლამო ბადიდან გიორგი გახარიას პარტიის უფასო პოლიტიკური რეკლამის ამოღება მოითხოვა.

გავრცელებული ინფორმაციით, "ფორმულას" კომუნიკაციების მარეგულირებელმა კომისიამ გიორგი გახარიას პარტიის საარჩევნო რგოლის ეთერში გაშვების გამო უჩივლა. დავა შეეხებოდა პარტიის კვალიფიციური სუბიექტის სტატუსის მინიჭებას, რის შედეგადაც ტელეკომპანიამ პარტიას უფასო სარეკლამო დრო დაუთმო.

რეგულაციების მიხედვით, მაუწყებელმა კვალიფიციურ საარჩევნო სუბიექტად ის პოლიტიკური პარტია უნდა აღიაროს, რომელიც არჩევნების წელს ჩატარებული კვლევის მიხედვით ამომრჩეველთა არანაკლებ 4%-ის მხარდაჭერით სარგებლობს.

მარეგულირებელმა კომისიამ ტელეკომპანიას დოკუმენტაციის წარდგენა სთხოვა კვლევის შედეგების შესამოწმებლად, რადგან "ფორმულამ" Edison Research-ის კვლევით იხელმძღვანელა, ხოლო მათი კვლევის მიხედვით, გახარიას პარტიას 4%-ზე მეტი მხარდაჭერა ჰქონდა.

“მარეგულირებელმა ფაქტობრივად დაგვავალა, რომ Edison Research-ის კვლევის აუდიტირება და მისი შემოწმება მოგვეხდინა. ჩვენ, ცხადია, ვენდობით Edison-ის მონაცემებს და ვერ ვხედავთ ვერანაირ საჭიროებას, რომ მათი მონაცემები გადამოწმდეს. ცხადია, ეს ყველაფერი კეთდება იმისთვის, რომ თანაბარი გარემო არ იყოს მიღწეული ქვეყანაში და ოპოზიციურ პარტიებს შეეზღუდოთ მათი სარეკლამო აქტივობების შესაძლებლობა", — განაცხადა “ფორმულას” გენერალურმა დირექტორმა, ზუკა გუმბარიძემ.