პარტია გახარია-საქართველოსთვის ლიდერის, გიორგი გახარიას განცხადებას კომუნიკაციების თავმჯდომარე, კახი ბექაური ეხმიანება და ამბობს, რომ გახარია ცდილობს "მედიის მარეგულირებელ დამოუკიდებელ ორგანოს გადაწყვეტილებაზე შანტაჟითა და მუქარით ზეწოლა მოახდინოს".

"გახარიას მცდელობა აქვს მედიის მარეგულირებელ დამოუკიდებელ ორგანოს გადაწყვეტილებაზე ზეწოლა მოახდინოს მუქარის და შანტაჟის გზით. ეს არ არის ის გზა, რომელიც სასურველ შედეგს მიაღებინებს. გახარიას მსგავსი დიქტატორული მიდრეკილების პოლიტიკური ელემენტები ჩემს ცხოვრებაში მრავლად შემხვედრიან, მათ შორის წინა ხელისუფლებაშიც. გახარია არც პირველია და არც უკანასკნელი. მსგავს მუქარებს ჩემს საქციელზე და გადაწყვეტილებებზე გავლენა არც წარსულში მოუხდენია და ვერც მომავალში მოახდენს", — ამბობს ბექაური.

მანამდე, გახარიამ კომუნიკაციების კომისია უკანონო ქმედებებში დაადანაშაულა. მან ბექაურს მიმართა და თქვა, რომ პერსონალიზებული იქნება მისი პარტიისთვის უფასო სატელევიზიო რეკლამაზე წვდომის არმიცემის უკანონო მცდელობისთვის პასუხისმგებლობა.

"ჩემი საუბრის დღევანდელი თემა გახლავთ ის პროცესი, რომელიც ახლა კომუნიკაციების კომისიაში მიმდინარეობს - პროცესი, რომლის მიზანი გახლავთ, ჩვენს პარტიას უფასო სატელევიზიო რეკლამაზე წვდომა არ მისცეს. სულ რამდენიმე დღის წინ, საზოგადოებრივმა მაუწყებელმა ჩვენ კვალიფიციური სუბიექტის სტატუსი მოგვანიჭა, რაც იმას ნიშნავს, რომ ჩვენს პარტიას უფასო რეკლამაზე წვდომა უნდა ჰქონდეს. როგორც კი საზოგადოებრივმა მაუწყებელმა ეს გადაწყვეტილება მიიღო, პროცესში მაშინვე მარეგულირებელი ჩაერთო, რომელმაც ჯარიმის მუქარით, უკანონოდ დააორგანიზა ის პროცესი, რომელიც ახლა მიმდინარეობს და რომლის მიზანიც არის, რომ ყველა ეროვნულ მაუწყებელს აუკრძალონ ჩვენი უფასო პოლიტიკური რეკლამის განთავსება ტელესივრცეში.

მინდა, პერსონალურად კახა ბექაურს მივმართო. ძალიან კარგად მესმის, რომ მონური დამოკიდებულება ძალიან მარტივი და სწრაფი გზაა გამდიდრებისკენ, მაგრამ კომუნიკაციების მარეგულირებელი კომისია დამოუკიდებელი უწყებაა, რომელიც საქართველოს მოქალაქეებს უნდა ემსახურებოდეს, განსაკუთრებით, წინასაარჩევნო პერიოდში და ყველაფერს აკეთებდეს იმისთვის, რომ მოქალაქეებს ინფორმირებული არჩევანის გაკეთების შესაძლებლობა ჰქონდეთ. მინდა, გავაფრთხილო, პირადად მე, გიორგი გახარიამ, რომ პასუხისმგებლობა იქნება პერსონალიზებული და ამ პასუხისმგებლობას ვერავინ ვერ გაექცევა და ვერავისთვის უკან გასასვლელი კარი ვერ იქნება", — განაცხადა გახარიამ.