იმის გამო, რომ საქართველოში ოპოზიცია აღარ არსებობს, ქართული ოპოზიციის ჩანაცვლება გარე აქტორებს მოუწია იმისთვის, რომ ბარიერი მაინც გადალახონ — სამწუხაროდ, მათი ჩანაცვლება ელჩებსაც მოუწიათ, რომლებიც უმრავლესობის მიერ არჩეული ხელისუფლების წინააღმდეგ პოზიციონირებენ, — ამის შესახებ ქართული ოცნების ერთ-ერთმა ლიდერმა, მამუკა მდინარაძემ ბრიფინგზე განაცხადა.

გერმანიის ბუნდესტაგში, ქართული ოცნების ხელისუფლების მიმართ მომზადებულ კრიტიკულ რეზოლუციასთან დაკავშირებით მდინარაძემ აღნიშნა, რომ ამ რეზოლუციის მიღება გარე ძალების მიერ კოორდინირებული, საქართველოს შიდა საქმეებში ჩარევის მცდელობაა.

"საზოგადოებას ვაფრთხილებდით და ვაფრთხილებთ - მეგობრებო! გარედან ძალიან ბევრი შემოტევა იქნება. რაც უფრო მეტად მოახლოვდება არჩევნები, მით მეტად გამძაფრდება საქართველოს შიდა საქმეებში ჩარევის მცდელობები, მით უფრო გამძაფრდება ცუდი და ნეგატიური განცხადებები. ეს იმიტომ, რომ ოპოზიცია არ არსებობს და აგენტურა აგენტურულ დავალებას ვერ ასრულებს", — განაცხადა მამუკა მდინარაძემ.