უკრაინის თავდაცვის ძალების ცნობით, უგლედარის დაცემიდან ერთ კვირაზე ნაკლებში რუსეთის არმიამ ქალაქ ტორეცკის შემოგარენს მიაღწია.

"სიტუაცია არასტაბილურია, ბრძოლა ქალაქის ყველა შესასვლელთან მიმდინარეობს. რუსები ქალაქის აღმოსავლეთ გარეუბნებში შევიდნენ", — განაცხადა ოპერატიული ტაქტიკური ჯგუფი ლუჰანსკის სპიკერმა ანასტასია ბობოვნიკოვამ უკრაინის ეროვნულ მაუწყებელთან საუბარში

რუსეთის თავდაცვის სამინისტრო კომენტარს არ აკეთებს, თუმცა სამხედრო ბლოგერების ცნობით, საოკუპაციო ძალები ქალაქის ცენტრისკენ მიიწევენ.

რუსეთი ტორეცკისკენ აგვისტოდან მიიწევს, რისთვისაც მნიშვნელოვან ადამიანურ ძალას, ტექნიკასა და მართვად ბომბებს იყენებს. ვოლოდიმირ ზელენსკიმ სამხედრო მაღალჩინოსნებს უბრძანა, გააკეთონ ყველაფერი, რათა აგრესორის წინსვლა შეაჩერონ.

ტორეცკი რუსეთის სამხედრო აგრესიას 10 წელიწადზე მეტია იგერიებს — ქალაქი 2014 წელს რუსეთის მხარდაჭერილი სეპარატისტების მიერ ოკუპირებული ტერიტორიების მიმდებარედ მდებარეობს.

დონბასის რეგიონის დაკავება რუსეთის სამხედრო აგრესიის ერთ-ერთი მთავარი მიზანია, რისთვისაც ტორეცკი ცენტრალური რგოლია. ანალიტიკოსების აზრით, ტორეცკის დაკავება მოსკოვს შესაძლებლობას მისცემს, საკვანძო ლოჯისტიკური გზები დააზიანოს.

2022 წელს კიევზე უშედეგო იერიშის შემდეგ, რუსეთის სამხედრო აგრესიის ფოკუსში უკრაინის აღმოსავლეთით მდებარე ინდუსტრიული რეგიონი დონბასი მოექცა, რომელიც დონეცკისა და ლუჰანსკის რეგიონებს ესაზღვრება.